Վատիկանում երկուշաբթի կայացել է Հռոմի պապ Ֆրանցիսկոսի և Թուրքիայի նախագահ Ռեջեփ Թայիփ Էրդողանի հանդիպումը։
Քահանայապետի ու Թուրքիայի նախագահի հանդիպումը եղել է դռնփակ։ Կապված Էրդողանի վատիկանյան այցի հետ՝ BBC-ի թուրքական ծառայությունը նյութ է հրապարակել՝ նվիրված Անկարայի և Վատիկանի հարաբերություններին, որոնք Հայոց ցեղասպանության վերաբերյալ պապի դիրքորոշման պատճառով վերապրում են ոչ այնքան լավ ժամանակներ։
Իր ռեպորտաժում BBC-ն հիշեցնում է, որ 2015 թվականի ապրիլի 12-ին Վատիկանում պատարագի ժամանակ Հռոմի պապն անդրադարձել էր Հայոց ցեղասպանության թեմային՝ անվանելով այն XX դարի առաջին ցեղասպանություն և հիշեցնելով հռչակագրի մասին, որը ստորագրել էին Հռոմի պապ Հովհաննես Պողոս Երկրորդն ու Ամենայն Հայոց կաթողիկոս Գարեգին Երկրորդը։
Դրանից հետո Թուրքիան հետ էր կանչել Վատիկանից իր դեսպանին, իսկ պապի ելույթը ենթարկել կոշտ քննադատության՝ մեղադրելով նրան պատմական հարցի քաղաքականացման մեջ։ 10 ամիս Թուրքիան Վատիկանի հետ դիվանագիտական հարաբերությունները պահպանել է ժամանակավոր հավատարմատարի մակարդակով։ Թուրք դեսպանը Վատիկան է վերադարձել միայն 2016 թվականի փետրվարին՝ երկկողմ բանակցություններից հետո։
Հոդվածագիրը միաժամանակ նշում է, որ Էրդողանի քննադատությունը չի ազդել Հայոց ցեղասպանության հարցով Հռոմի պապի դիրքորոշման վրա։ Թուրք դեսպանի վերադարձից ամիսներ անց Հռոմի պապն այցելել է Հայաստան և ևս մեկ անգամ արտաբերել «ցեղասպանություն» բառը։
Նախագահի մակարդակով թուրքական վերջին այցը Վատիկան կատարվել է 59 տարի առաջ՝ 1959 թվականին։ Հռոմի պապը վերջին անգամ Թուրքիա է այցելել 2014 թվականին։