Այսօր, փետրվարի 5-ին, Իտալիայի մայրաքաղաք Հռոմում անկարգություններ են տեղի ունեցել՝ կապված Թուրքիայի նախագահ Ռեջեփ Թայիպ Էրդողանի այցի հետ։
Բախումների արդյունքում տուժել է առնվազն մեկ մարդ։ Բախումները եղել են քուրդ ցուցարարների հետ, ովքեր մասնակցում էին բողոքի արտոնված ակցիային՝ Հռոմում, Սուրբ Հրեշտակի ամրոցի մոտ։
Ակցիայի ավարտին միտինգավորների խումբը հանել է «Էրդողան՝ մարդասպան» ցուցանակները և փորձել է անցնել Սուրբ Պետրոսի տաճարի կողմը, ինչին ի պատասխան ոստիկանությունը ուժ է կիրառել։
Ավելի վաղ հաղորդվել էր, որ Էրդողանը պաշտոնական այցով ժամանել է Վատիկան, որտեղ հանդիպում է ունեցել Հռոմի կաթոլիկ եկեղեցու առաջնորդ՝ Հռոմի Պապ Ֆրանցիսկոսի հետ։