Այսօր «Ելք» դաշինքի հանրահավաք-երթի մեկնարկից ժամեր առաջ, Նիկոլ Փաշինյանը փորձել էր ինտրիգ ստեղծել: Նա ՖԲ իր էջում ուղիղ կապով տեղեկացրել էր հանրությանը, որ հանրապետության տարբեր հատվածներում ոստիկաններ են այցելում ակտիվիստների խմբերի և նրանց հորդորում են այսօր ժամը 18.00-ին Շառլ Ազնավուրի հրապարակ չգնալ և ընդդեմ թանկացումների երթին չմասնակցել։ Փաշինյանի խոսքը, մեղմ ասած, համոզիչ չէր և, անկեղծ ասած, նման էր նրան, որ դաշինքի առաջնորդն ալիբի է ստեղծում հանրահավաքի կանխատեսելի սակավամարդությունն արդարացնելու համար: Սակայն տարիներով ծեծված այս հնարքն այլևս չի գործում, որովհետև իշխանությունները հազիվ թե ռեսուրս շռայլեին, ըստ էության, լոկալ մի երթ վիժեցնելու համար, մանավանդ, որ հունվարի 19-ին հաշվել էին ընդդիմության «ատամները» և այսօրվա հանրահավաք-երթի մեջ ռիսկեր չէին տեսնում:
Սակայն առավել ուշագրավ է Փաշինյանի խոսքի մեկ այլ շեշտադրում: Նա հատուկ ընդգծում է, որ ոստիկանությունը ոչ թե սպառնացել կամ ահաբեկել է մարդկանց, այլ նրանց ընդամենը բարեկամաբար հորդորել, համոզել է` հանրահավաքի չգնալ: Նիկոլ Փաշինյանն ակամայից զբաղվել է ոստիկանության և նրա պետ Վլադիմիր Գասպարյանի PR-ով, որովհետև ստացվում է` վերջինիս խոսքը հասարակության համար ավելի համոզիչ է, քան ընդդիմության կոչերը, պայքարի դուրս գալու կարգախոսները: Վերջին հինգ տարվա ընթացքում սա առնվազն երկրորդ դեպքն է, երբ Վլադիմիր Գասպարյանի արգումենտները հասարակության համար ավելի հիմնավոր են դառնում, քան` հեղափոխական կոչերը: 2013թ-ի նախագահական ընտրություններից հետո փողոց դուրս եկած տասնյակ հազարավոր ցուցարարների ուղղորդում էր ոչ Րաֆֆի Հովհաննիսյանը, այլ Վլադիմիր Գասպարյանը, որն ընդդիմության առաջնորդին հակեց քաղաքական կապիտուլյացիայի` «համազգային աղոթքի» միջոցով: Եթե հավատանք Նիկոլ Փաշինյանին, այսօր Գասպարյանի ենթականերն են մարդկանց համոզել` մնալ տներում:
Իրականում՝ խնդիրը ոչ իշխանության ռեպրեսիաներն են, ոչ էլ` Վովա Գասպարյանի հատուկ տաղանդը: Հայաստանում ընդդիմությունն ինստիտուցիոնալ ճգնաժամ է ապրում և այն փորձում է հաղթահարել ստանդարտ, ոչ ադեկվատ քայլերով` իր հանդեպ ավելի մեծացնելով հանրային անվստահությունը: Նույնիսկ կարելի է արձանագրել, որ բովանդակային հարթության վրա սպառված իշխանությունը շատ ավելի կրեատիվ է, քան` իրեն արժեքային դաշտում համարող ընդդիմությունը: Երկրում բացակայում է այլընտրանքը, ինչի հետևանքով քաղաքական օրակարգ և օրացույց թելադրում է բացառապես իշխանությունը` ընդդիմությանը վերապահելով դեկորատիվ բնույթ:
«Պատմագրության մեջ կան դարաշրջաններ, կա բրոնզե դարաշրջան, երկաթե դարաշրջան։ Մեր ընթացիկ շրջանը կոչվելու է «խառը կանաչու» դարաշրջան»,- երթի ավարտին ունեցած ելույթում կառավարությանը ծաղրել է Փաշինյանը։ «Ելք»-ի նախորդ երթից հիշվել է «բրդվող ջորին», այսօրվա երթից հիշվելու է «խառը կանաչին», մանավանդ, որ լավագույնս բնութագրում է մեր քաղաքական համակարգին:
Լուսանկարը՝ Photolure-ի
