ՀՀ 4-րդ նախագահի թեկնածու Արմեն Սարգսյանը մի քանի օր է հանդիպումներ է սկսել քաղաքական ուժերի, գիտական, հասարակական սեկտորի ներկայացուցիչների հետ։ ՀՀ նախագահ Սերժ Սարգսյանի կողմից առաջարկ ստանալուց հետո Արմեն Սարգսյանը հայտարարել էր, որ հանդիպումներ է ունենալու ինչպես խորհրդարանական, այնպես էլ արտախորհրդարանական ուժերի հետ։
«Ժառանգություն» կուսակցության փոխնախագահ Արմեն Մարտիրոսյանն «Առաջին լրատվական»-ի հետ զրույցում ասաց, որ իրենք առայժմ հրավեր չեն ստացել, ստանալու դեպքում՝ կքննարկեն վարչությունում և որոշում կկայացնեն. «Ընդհանրապես որևէ քաղաքավարական ժեստին անքաղաքավարի չենք պատասխանել, քննարկումներին նորմալ եմ նայում, որևէ խնդիր չկա»։
Ինչ վերաբերում է Արմեն Սարգսյանի անձին, մեր զրուցակիցը նշում է. «Ակնհայտորեն ինտելիգենտ շրջանակներից է, բայց դա Հայաստանին ոչինչ չի տալիս․ նա խոշոր գործարար է, ես դեմ եմ, որ խոշոր գործարարները պետական բարձր պաշտոններում լինեն, շահերի բախումը Հայաստանում այնքան ակնհայտ է, որ ևս մեկ բախում ես չեմ ուզում տեսնել։ Եվ երրորդ խնդիրն այն է, որ ես կցանկանայի՝ ՀՀ-ում լինեն այնպիսի ղեկավարներ, որոնց սերունդներն իրենց ապագան կապում են Հայաստանի հետ»։
Հայ ազգային կոնգրեսը ևս հրավեր չի ստացել։ Կուսակցության վարչության անդամ Վարդան Մալխասյանը «Առաջին լրատվական»-ի հետ զրույցում ասաց, որ որևէ տեղեկություն չունի։ Սահմանադրական փոփոխությունների ամենախիստ քննադատ՝ Հայ ազգային կոնգրեսը, այն կարծիքին է, որ նախագահը սահմանափակ լիազորություններով օժտված մեկն է, և ով էլ զբաղեցնի այդ պաշտոնը՝ որևէ էական բան չի փոխվելու։
Հայաստանի ժողովրդական կուսակցության փոխնախագահ Գրիգոր Հարությունյանը «Առաջին լրատվական»-ի հետ զրույցում ասաց, որ իրենք հանդիպման հրավեր չեն ստացել՝ ստանալու դեպքում կքննարկեն։
Ազգային ինքնորոշում միավորումը ևս հրավեր չի ստացել։ Կուսակցության վարչության անդամ Գագիկ Սարուխանյանը «Առաջին լրատվական»-ի հետ զրույցում չբացառեց, որ ստանալու դեպքում հրավերը կընդունեն. «Համենայնդեպս, եթե գնում ենք Ալիևի հետ հանդիպում՝ ընդհանուր եզրեր գտնելու համար, կարելի է երևի թե հանդիպել ու տեսնել, թե ինչ տրամադրվածություն ունի։ Եթե Ալիևը թշնամի է, անգամ թշնամու հետ ես հանդիպում՝ խնդիր չկա, մենք մեկուսացման մեջ չենք»։
Միևնույն ժամանակ մեր զրուցակիցն ասաց, որ մեծ հույսեր հանդիպումից չեն կապում. «Մի մարդ, որ նշանակված է՝ նույն բանն է, ոնց որ ասենք՝ արտախորհրդարանական ուժերը գնան սոցապ կամ առողջապահության նախարարի հետ հանդիպեն։ Եթե մի մարդը նշանակված է, նշանակել են, որ ասեն՝ այսպես աշխատի, ի՞նչ խոսենք նրա հետ։ Ավելի լավ է՝ խոսենք ՀՀԿ ղեկավարների հետ, հասկանանք՝ ինչ են անելու հետագայում այս հարցի շուրջ, հարցնենք՝ ինչո՞ւ եք կեղծել Սահմանադրությունը, ինչո՞ւ եք կեղծված Սահմանադրության հիման վրա մարդ նշանակում։ Եթե մի մարդու նշանակում են աշխատանքի՝ պահանջում են ինչ-որ ձևով աշխատի։ Եթե նա ընտրված չէ՝ վերջացած է, միայն ընտրվածը կարող է աշխատել այնպես, ինչպես խոստացել է իր ընտրողներին։ Մնացածը խաղիկներ են։ Սերժ Սարգսյանն ի սկզբանե ասում էր՝ նախագահը պետք է լինի այսպես-այնպես, պետք է օտար լեզու իմանա, կուսակցական չլինի՝ դա ի՞նչ է, ես էլ ասում եմ՝ մեր նախագահն ու վարչապետը ձեր նման տականք չպետք է լինեն, բայց ո՞վ է մեզ լսողը»։
Սարուխանյանը եզրափակում է. «Բռնազավթված երկրում մեծ հույսեր կապել պետք չէ, բայց և հանդիպումից հրաժարվել էլ պետք չէ»։
Լուսանկարը՝ Photolure-ի