Կառավարության նիստերը դռնփակ ռեժիմով անցկացնելը Ինֆորմացիայի ազատության կենտրոնի հիմնադիր Շուշան Դոյդոյանը համարում է լրջագույն խնդիր ` շեշտելով, որ դա մեծացնելու է կառավարության նկատմամբ հասարակության ունեցած անվստահությունը։ «Ես սա, միանշանակ, հետընթաց եմ համարում տեղեկատվության մատչելիության, հանրային մասնակցության առումով. նախորդ 10 տարիներին կառավարության նիստերն եղել են դռնբաց և լրագրողներն արձանագրել են այն ամենը, ինչ տեղի է ունեցել այդ նիստեր ընթացքում, ինչը միայն դրականորեն է ազդել կառավարության գործունեության թափանցիկության և ինչ-որ առումով նաև կառավարության հանդեպ վստահության ձևավորման վրա, իսկ հիմա փակելով նիստերը լուրջ կասկածների տեղիք են տալիս, թե այդ ինչեր են այնտեղ կատարվելու, որ անհրաժեշտություն է առաջանում փակել դռները լրատվամիջոցների, հետևաբար նաև հանրության առջև», – «Առաջին լրատվական»-ի հետ զրույցում շեշտեց Շուշան Դոյդոյանը։
Վերջինիս դիտարկմամբ, որպեսզի կոռուպցիոն ռիսկերը հնարավորինս նվազեցվեն և հակակոռուպցիոն ռազմավարությունը ծառայի իր նպատակին, ապա կառավարության ողջ գործունեությունը, բոլոր գործընթացները պետք է լինեն բաց ու հրապարակային, մինչդեռ նման օրենքի նախագիծը նշանակում է, որ այսուհետ կառավարությունը կկարողանա ամբողջությամբ կառավարել կառավարությունից դեպի հասարակություն գնացող ամբողջ լրատվական հոսքը։
Հիշեցնենք, որ կառավարության փետրվարի 1-ի նիստում հավանության արժանացավ «Կառավարության կառուցվածքի և գործունեության մասին» օրենքի նախագիծը, որն օրենքով սահմանված կարգով կներկայացվի նաև ԱԺ: Օրենքի նախագիծը կառավարության նիստում ներկայացրեց արդարադատության նախարար Դավիթ Հարությունյանը: Թվարկելով առաջարկվող փոփոխությունները՝ նախարարը նշեց նաև, որ օրենքով սահմանվել է, որ կառավարության նիստերը դռնփակ կանցկացվեն: Օրենքի նախագծով սահմանվում է, որ կառավարության անդամն իրավունք չունի առանց վարչապետի թույլտվության տեղեկատվություն հրապարակել կառավարությունում քննարկված որևէ հարցի քննարկման ընթացքի մասին: Կառավարության նիստերն արձանագրվում են վարչապետի աշխատակազմի կողմից: Նիստի արձանագրությունը կամ դրա մի մասը վարչապետի հանձնարարությամբ կարող է հրապարակվել:
Մանրամասները`տեսանյութում։
Լուսանկարը՝ armeniasputnik.am-ի
