Իրանը 25 տարում առաջին անգամ սև ձկնկիթ է մատակարարել ԱՄՆ։ Դա հնարավոր է դարձել ԱՄՆ սննդամթերքի և դեղորայքի որակի սանիտարական վերահսկման վարչության (FDA) կողմից թույլտվություն ստանալուց հետո։ Այս մասին հայտնում է Fars գործակալությունը՝ հղում անելով իրանական Specialized Holding ընկերության ներկայացուցիչ Աբաս Ռաջայիին։
«FDA-ի կողմից հավաստագիր ստանալուց հետո անցած տարի մենք ԱՄՆ ենք մատակարարել 10 կգ սև ձկնկիթ։ Խմբաքանակի արժեքը գնահատվում է 13 հազար դոլար»,-ասել է նա։
Ռաջային հայտնել է, որ Իրանը մտադիր է մեծացնել մթերքի արտահանումը նաև այլ երկրներ։ Իրանի Մաքսային ծառայության տվյալներով՝ 2017 թվականի մարտից հոկտեմբեր երկրից արտահանվել է մոտ 1.4 մլն դոլարի ավելի քան 557 կգ ձկնկիթ։ Արտահանման ուղղություններն են դարձել Գերմանիան, Իտալիան, ԱՄՆ-ը, Բելգիան, Ֆրանսիան, Մեծ Բրիտանիան, ԱՄԷ-ն, Հոնկոնգը, Իսպանիան, Ճապոնիան, Ավստրալիան, Սինգապուրը, Դանիան, Կանադան և Քուվեյթը։