Աշտարակ կաթ ընկերությունը դատի է տվել 259 փոքր ձեռնարկատերերի՝ պահանջելով նախկինում մատակարարված կաթնամթերքի գումարները, որոնք ինչպես այդ խանութների սեփականատերերն են հավաստիացնում՝ վճարել են առաքիչներին կաթնամթերքն իրենց խանութ առաքելու պահին։
««Աշտարակ կաթ»-ի և կաթնամթերք մատակարարող մնացած բոլոր ընկերությունների հետ տարիներ շարունակ աշխատել ենք բացառապես կանխիկ վճարումներով, որովհետև կաթնամթերքը կարճ ժամկետ ունեցող ապրանք է և շատ քիչ քանակությամբ ենք ստանում, օրինակ իմ խանութ օրը մեջ կտրվածքով են «Աշտարակ կաթ»-ի ապրանք բերում ու ընդամենը 1800-2000 դրամի, որովհետև էդքանից ավել չի էլ վաճառվում։ Հենց առաքիչները բերում են՝ նույն րոպեին վճարում ենք նրանց գումարը, իսկ եթե չվճարենք՝ նրանք ապրանքը նույն վայրկյանին հետ կտանեն, բայց նրանք երբեք մեզ վճարման անդորրագիր չեն տվել, որ հիմա մենք ապացույց ունենանք, որ գումարները միշտ վճարված են եղել․ մենակ ես չեմ էս օրին, ինձ նման 259 փոքր խանութպաններ, որոնք էս փոքր խանութներն աշխատացնելով են իրենց հացի փողը հոգում։ Մի քանի օր առաջ դատարանից ծանուցագիր ստացանք, որ «Աշտարակ կաթ»-ը մեզ դատի ա տվել, ամեն մեկիս վրա տարբեր գումարներ ա դրել՝ 1 միլիոն դրամ, 2 միլիոն դրամ , 100 հազար դրամ, մարդ կա անգամ 5 միլիոն դրամ փող են վրեն գրել»,- «Առաջին լրատվական»-ի հետ զրույցում տեղեկացրեց Լուսյա Հարությունյանը, որի դեմ ևս «Աշտարակ կաթ» ընկերության կողմից դատական հայց է ներկայացվել։
«Աշտարակ կաթ»-ի այսպիսի գործունեությունից տուժածները վստահ են, որ «Աշտարակ կաթ» ընկերության կողմից սա կանխամտածված հանցավոր քայլ է․ «2016թ-ին սնանկանալուց հետո «Աշտարակ կաթ»-ը չգիտեր ինչպես փակեր իր կուտակած միլիոնավոր պարտքերը ու դրա համար էլ դիմեց էս խարդախությանը ու սնանկացման կառավարիչը մեր վրա գործ հարուցեց։ Տեղեկություններ ունենք, որ դրանց հաշվապահը փողերն առել թռել ա երկրից ու մեզ հիմա փորձում են դատարանի միջոցով պարտադրել ուրիշի լափած փողերը նորից վճարել, չի լինելու տենց բան։ Ես գիտեի, որ մեր երկիրը բարդակ ա, բայց որ ես կարգի բարդակ՝ չէի պատկերացնում»,- շեշտեց Լուսյա Հարությունյանը։
Մանրամասները՝ տեսանյութում։