«Ղարաբաղյան հիմնախնդրի փաթեթային հանգուցալուծման և փուլային կիրառման մասին Հայաստանի արտգործնախարարի խոսքը սովորական լարախաղացություն է, որը երկար տարիների պատմություն ունի: Հիշում եմ, որ դեռ Լևոն Տեր-Պետրոսյանն էր ասում, թե «ես չեմ տեսնում սկզբունքային տարբերություն փուլայինի և փաթեթայինի միջև»,- «Առաջին լրատվական»-ի հետ զրույցում նշեց Պրահայի «Ազատություն» ռադիոկայանի «Էխո Կավկազա» ծառայության քաղաքական մեկնաբան Վադիմ Դուբնովը՝ մեկնաբանելով Էդվարդ Նալբանդյանի խոսքերը Ղարաբաղյան հակամարտության կարգավորման մասին հունվարի 29-ին կայացած տարվա ամփոփիչ ասուլիսի ընթացքում:
Հայաստանի արտգործնախարարը շեշտել էր, որ Մինսկի խմբի եռանախագահները բազմիցս հայտարարել են, որ հակամարտությունը պետք է լուծվի այն սկզբունքների, տարրերի հիման վրա, որոնք մշակվել ու ներկայացվել են կողմերին որպես մեկ ամբողջություն, որպես փաթեթ:
«Փորձել առանձնացնել մեկ սկզբունքը, կամ դրույթներից մեկը մյուսներից, անհնար կդարձնի հիմնախնդրի կարգավորումը։ Այս փաթեթային մոտեցումն է, որն առաջարկված է եռանախագահող երկրների կողմից և դրա մասին նաև բազմիցս հայտարարվել է՝ ներառյալ նաև ամենաբարձր՝ նախագահների մակարդակով, եռանախագահող երկրների կողմից։ Բայց իհարկե մենք պետք է նկատի ունենանք, և դրա մասին էլ մենք բազմիցս նշել ենք, որ փաթեթային հանգուցալուծումը, բնականաբար, նկատի ունի նաև փուլային կիրառում այդ փաթեթային հանգուցալուծման»,- ասել էր Նալբանդյանը:
Ավելի վաղ փուլային և փաթեթային լուծումներին անդրադարձել էր նաև Ռուսաստանի արտգործնախարար Սերգեյ Լավրովը՝ ասելով, թե Լեռնային Ղարաբաղի խնդիրը հնարավոր չէ մեկընդմիշտ լուծել մեկ փաստաթղթով, անհրաժեշտ է փուլային մոտեցում:
Քաղաքական մեկնաբան Վադիմ Դուբնովի կարծիքով՝ նման հայտարարությունները նորություն չեն. «Սա նշանակում է, որ շարունակվում են խաղերը, շարունակվում են քննարկումները, և կողմերն ուզում են ժամանակ շահել՝ դուրս գալու բանակցությունների հերթական շրջապտույտի, որը, այսպես թե այնպես, ոչ մի արդյունք էլ չի տալու»:
Դուբնովը հեռանկարային չի համարում բանակցությունները նույնիսկ Կրակովում Հայաստանի և Ադրբեջանի արտգործնախարարների վերջին հանդիպումից հետո, որի ընթացքում կողմերը սկզբունքորեն համաձայնության էին եկել շփման գծում ԵԱՀԿ դիտորդների թիվը ավելացնելու հարցի շուրջ:
«Գիտեք, կան տեխնիկական պայմանավորվածություններ և կան ռազմավարական բնույթի պայմանավորվածություններ: Տեխնիկական պայմանավորվածությունները շատ պրակտիկ են, դրանց նպատակները շատ ազնիվ են, և սա ամենահետաքրքիրն է, որովհետև սա միակ արդյունքն է, որին կարելի է հասնել: Բայց դրանք ունեն մեկ այլ օգտակար ֆունկցիա: Տեխնիկական պայմանավորվածությունները թույլ են տալիս ձգձգել ռազմավարական համաձայնության հասնելը: Երբ ժամանում եք Կրակով, կարող եք ելույթ ունենալ մամուլի ասուլիսին և ասել, թե հասել եք դիտորդների թվի ավելացմանը, ինչը, իհարկե, շատ կարևոր է, դա ազատում է ձեզ հակամարտության կարգավորման գլոբալ ապագայի մասին հարցերին պատասխանելու անհրաժեշտությունից»,- ավելացրեց Վադիմ Դուբնովը:
