Արթիկ քաղաքում արդեն մեկ տարուց ավել է ՀԷԿ է գործում, որ կառուցվել է քաղաքի խմելու ջրի պաշարների վրա: «Արթիկ 1» կոչվող ՀԷԿ-ը շահագործում է «Արթիկ ՓՀԿ» ՍՊԸ-ն, որը, հավաստի տեղեկություններով, պատկանում է Ջրային կոմիտեի նախկին պետ Սուրեն Սահակյանին ու ԲՀԿ-ական պատգամավոր Մուշեղ Պետոյանին:
Բնակիչները բողոքում են, որ առանց այն էլ իրենք օրվա ընթացքում մի քանի ժամ են ջուր ստանում, իսկ ՀԷԿ-ի կառուցումից հետո ընդհանրապես զրկվել են նորմալ ջրամատակարարումից: Բացի դա, բնակիչների խոսքերով, ՀԷԿ-ի գործունեության հետևանքով խմելու ջրի որակը վատացել է, քանի որ ՀԷԿ-ով անցնելով՝ խմելու ջուրը «հարստացվում» է բազմաթիվ թունավոր նյութերով:
«Մենք վախենում ենք, որ բոլորը, ով էդ ջրից խմում են՝ քաղցկեղով կհիվանդանան: Վերջին շրջնում նման դեպքերը շատացել են, և դա ուղղակիորեն կապված է ջրի որակի հետ»,- դժգոհեցին բնակիչները:
Փորձեցինք Մուշեղ Պետոյանից ճշտել, թե որպես «ազգընտիր» չի՞ անհանգստանում բնակիչների առողջության համար, սակայն ԲՀԿ-ական պատգամավորը նախահարձակ եղավ և հերքեց, թե ինքը կապ ունի այդ ՀԷԿ-ի հետ: «Այո, Արթիկում ՀԷԿ կա՝ շատ փոքր, ոչ գետի վրա կառուցված ՀԷԿ ա, բայց ես դրա հետ ոչ մի կապ չունեմ: Էդ ես չեմ կառուցել, ես տեղյակ չեմ: Դա սեփականատեր ունի` Սահակյան Սուրենը, Ջրմուղի նախկին տնօրենը: Իր ծրագիրն է, իրեն տվեք բոլոր հարցերը: Ես ուզեցել եմ էդ ՀԷԿ-ը առնեմ, բայց հետո չեմ առել, չստացվեց»,- ասաց Պետոյանը: Իսկ երբ մենք շարունակեցինք մի քանի այլ ճշտող հարց ևս տալ, ԲՀԿ-ականը բորբոքվեց և ըստ էության խոստովանեց, որ ՀԷԿ-ն իրեն է պատկանում: «Ասենք թե իմն է, դա ի՞նչ նշանակություն ունի»,- դժգոհ ասաց նա` մոռանալով, որ նշանակությունն այն է, որ պատգամավորը չի կարող ձեռնարկատիրական գործունեությամբ զբաղվել` չհաշված այն, որ նա իր գործունեությամբ նաև վնաս է պատճառում տեղի բնակչությանը:
Բնապահպան Ինգա Զարաֆյանն «Առաջին լրատվական»-ի հետ զրույցում, անդրադառնալով խմելու ջրի վրա ՀԷԿ կառուցելուն և դրանից ջրի աղտոտվածությանն՝ ասաց, որ այս հարցում հակասական կարծիքներ կան, շատերն ասում են, որ հնարավոր չի ջուրը աղտոտվի, ջուրն ինչպես մտնում է էլեկտրակայան, այնպես էլ դուրս է գալիս, սակայն տիկին Զարաֆյանի խոսքով՝ այդպես չի կարող լինել. «Ջուրը չի կարող չփոփոխվել: Եթե այն մտնում է էլեկտրակայան, չի կարող չփոփոխվել, որովհետև կայան մտնելով՝ ջրի ֆիզիկաքիմիական հատկությունները փոփոխվում են»:
Ըստ Զարաֆյանի՝ հնարավոր չէ ասել, թե որքանով է էլեկտրակայանի միջով դուրս եկած ջուրը վնասակար, քանի որ չկա որևէ վերահսկիչ սանիտարական մարմին, որը կստուգի և կասի, թե ինչ է լինում ջրի հետ, երբ այն անցնում է էլեկտրակայանի խողովակների միջով:
Նշենք, որ մեր փոքրիկ հանրապետությունում ներկայումս 144 ՀԷԿ է գործում:
