«Առաջին լրատվական»-ի զրուցակիցն է ԱԺ փոխխոսնակ, ԵԽԽՎ հայաստանյան պատվիրակության ղեկավար Արփինե Հովհաննիսյանը
-Տիկին Հովհաննիսյան, վերջերս Ձեր ֆեյսբուքյան գրառմամբ տեղեկացրել էիք, որ ԵԽԽՎ պատվիրակների կողմից առաջարկ է ներկայացվել սոցիալական մեդիայում տարածվող ապատեղեկատվության համար պատասխանատվության ենթարկելու մասով: Ի՞նչ է դա ենթադրում։
-Ներկայումս, ինչպես գիտեք, սոցիալական լրատվամիջոցները քաղաքական բանավեճի համար կարևորագույն հարթակներից են, և հասարակական կարծիքի ձևավորման գործում դարձել են շատ ազդեցիկ: ԵԽԽՎ պատվիրակներից Լորդ Ջորջ Ֆուլկեսը հանդես է եկել նախաձեռնությամբ և, որպես լուծում, հեղինակն առաջարկել է, որ Խորհրդարանական վեհաժողովն ուսումնասիրի, թե ինչպես են օգտագործվում սոցիալական լրատվամիջոցները՝ յուրացնելով խոսքի ազատության հիմնարար սկզբունքը, ինչպես կարելի է հակազդել սոցիալական մեդիայի միջոցով տարածվող ապատեղեկատվությանը, այդ թվում՝ որոնման համակարգեր ստեղծելու միջոցով:
ԵԽԽՎ պատվիրակնեըը առաջարկում են, որ ԵԽ-ն իր տարբեր ձևաչափերով անդամ պետություններին պարտավորեցնի նախատեսել սոցիալական մեդիայի օգտագործման սահմանափակող կանոններ, որոնք կկանխարգելեն և կչեզոքացնեն ապատեղեկատվությունը և մանիպուլյացիաները, համաձայնեցված կանոնները խախտելու համար խիստ պատժամիջոցներ և այլն:
-Արա Ղազարյանը դիրքորոշում էր հայտնել, որ հայկական պատվիրակության ներկայացրած առաջարկները հեռանկարային չեն։ Նա ասել էր, որ Եվրոպայի խորհրդում նոր նախաձեռնությամբ հանդես գալը այնքան էլ հեղինակավոր թեմա չէ։ Ինտերնետը այնքան արագ է զարգանում, տարածվում, որ շատ արագ շրջանցում է բոլոր տեսակի կարգավորումները։ Ինչպե՞ս կմեկնաբանեիք։
-Նախ շեշտեմ, որ ԵԽԽՎ հայկական պատվիրակությունը այս նախաձեռնությանը որևէ առնչություն չունի, և պարոն Ղազարյանը թյուրիմացության մեջ է գցում հասարակությանը:
Ինչ վերաբերում է որակմանը՝ հեռանկարային է թե անհեռանկարային, ապա կարծում եմ, որ ոչ պարոն Ղազարյանը, ոչ էլ որևէ կոնկրետ անձ չեն կարող ի սկզբանե գնահատական հնչեցնել և որոշել դրա հեռանկարային կամ անհեռանկարային լինելը: Նախաձեռնությունն արդեն շրջանառվում է Խորհրդարանական վեհաժողովում, ապրիլին կնշանակվի զեկուցող, և ԵԽԽՎ-ում այդ թեմայով պատրաստվելու է զեկույց՝ համապատասխան հանձնարարականներով, խորհրդատվություններով ու երաշխավորություններով:
Ինչպիսին կլինի զեկուցողի և, առհասարակ, Վեհաժողովի կարծիքը, որը վերջում քվեարկելու է այս նախաձեռնությանը, կտեսնենք հաջորդիվ: