ՀՀ ԱԺ արտաքին հարաբերությունների մշտական հանձնաժողովը հունվարի 25-ին աշխատանքային քննարկում է ունեցել ՀՀ-ում ԱՄՆ արտակարգ և լիազոր դեսպան Ռիչարդ Միլսի հետ, ով հանձնաժողովին է ներկայացրել ԱՄՆ ազգային անվտանգության նոր ռազմավարությունը:
Հանդիպման ընթացքում անդրադարձ է կատարվել ինչպես գլոբալ անվտանգության արդի մարտահրավերիներին, այնպես էլ տարածաշրջանային կայունության ու զարգացման ապահովման հարցերին:
Հանձնաժողովի նախագահ Արմեն Աշոտյանը, ողջունելով քննարկման նմանատիպ ձևաչափը, նշել է, որ այսպիսի հանդիպումները խթանում են խորհրդարանի դերի բարձրացումը՝ միևնույն ժամանակ նպաստելով գործընկեր երկրների հետ վստահության ամրապնդմանը:
Անդրադառնալով տարածաշրջանային անվտանգության ապահովման կարևորությանը՝ Արմեն Աշոտյանն իր խոսքում նշել է. «Գլոբալ աշխարհում մարտահրավերները փոխկապակցված են և տարածաշրջանային կայունությունն ու Լեռնային Ղարաբաղի հակամարտության խաղաղ կարգավորումը մեզ համար առաջնային են»: Նա նաև ընդգծել է այն հանգամանքը, որ արդի աշխարհակարգը փոխվում է արագ և ակնհայտ է, որ միջազգային հարաբերությունները պետք է դառնան առավել արդար, համերաշխ և ներառական:
Իր հերթին դեսպանը նշել է, որ Միացյալ Նահանգները վերջին 25 տարիների ընթացքում Հայաստանում սատարել է ժողովրդավարական գործընթացներին և հաստատություններին ու նոր ազգային անվտանգության ռազմավարությամբ այս հանձնառությունը պահպանվում է:
Հանդիպման ընթացքում աշխատանքային քննարկման մասնակիցները հղել են հարցեր, հանդես եկել ելույթներով:
Հանդիպմանը մասնակցել են նաև ՀՀ ԱԺ խմբակցությունների ներկայացուցիչներ: