«Ոչ մի խնդիր չկա, ժողովուրդ ջան, կարագը թանկացել է, կանաչի կերեք։ Գառան միսը թանկացել է, կանաչ սոխ կերեք։ Խոզի միսը թանկացել է, սխտոր կերեք։ Բենզինը թանկացել է, բրդեք ձեր մեքենաները»,- այսօր թանկացումներին նվիրված խորհրդարանական լսումների ժամանակ կառավարությանը հեգնել է Նիկոլ Փաշինյանը: Վերջինս պատկերավոր ներկայացրել է նաև կառավարության վիճակագրական մանիպուլյացիայի սխեման: Նիկոլ Փաշինյանի խոսքերով՝ ստեղծվել է պատկերավոր մի կշեռք, որի մի նժարին դրվել են թանկացումները, մյուս նժարին՝ էժանացումները։ Հանրագումարի արդյունքում ստացվում է այն, որ համատարած գնաճի պայմաններում վիճակագրական ծառայությունը եկել է եզրակացության, որ գնաճն ընդամենը 2.6 տոկոս է։
Ընդդիմադիր պատգամավորը խոսել է փաստերով, և այս պարագայում կառավարության ներկայացուցիչների համար շատ դժվար է հակափաստարկ բերելը. նրանց մնում է ժողովրդին հորդորել՝ կանաչի կամ կանաչ սոխ ուտել, կամ էլ՝ ավանսով խոստանալ, որ կարագի գինը շուտով էժանանալու է:
Սակայն խնդիրը միայն վիճակագրական մանիպուլյացիան չէ. դա կառավարության կեղծարարությունների միայն այսբերգային դրսևորումն է, որի միջոցով փորձում են մարդկանց ուղեղները «լվանալ» ոչինչ չասող թվերի ու մասնագիտական տերմինների տարափով:
Նույն կեղծիքի դրսևորումն են նաև խորհրդարանական այսօրվա լսումները, որոնց ընթացքում խոսվում է գործնականում ամեն ինչից, վերլուծվում է անգամ միջազգային շուկայի կոնյուկտուրան, սակայն շրջանցվում է հիմնական թեման՝ ինչպե՞ս անել, որ կանխվեն սպեկուլյատիվ թանկացումները, որոնք առաջին հերթին հարվածում են հասարակության անապահով խմբերի գրպանին:
Խիստ կենսական է, նույնիսկ անհրաժեշտություն՝ պարզել, թե թանկացումների որ հատվածն է բաժին ընկնում միջազգային ոչ բարենպաստ կոնյուկտուրային, որը՝ մեր տնտեսության կառուցվածքին:
Հենց այս հարցի պատասխանին պետք է հետամուտ լինի ընդդիմությունը, որովհետև, եթե կառավարությունն անզոր է ազդել, օրինակ, կարագի կամ բենզինի միջազգային գների վրա, ապա կարող է ու պարտավոր է վերացնել դրանց ներկրման մենաշնորհը, որպեսզի միջազգային կոնյուկտուրան Հայաստանում գնային սպեկուլյատիվ քաղաքականության պատճառ չդառնա:
Կարեն Կարապետյանի կառավարությունը գուցե իսկապես մեղավոր չէ, որ համաշխարհային շուկայում թանկանում են բենզինի գները, բայց հաստատ մեղավոր է այն հարցում, որ Հայաստանի տնտեսական հարաբերություններում բացակայում է մրցակցության բաղադրիչը, ինչը բերում է նրան, որ դրսի թանկացումները աղետի առաջ են կանգնեցնում Հայաստանի տնտեսությունը, իսկ համաշխարհային շուկայում գնանկումը, որպես կանոն, շրջանցում է Հայաստանը:
Մաքսային միությունն անհրաժեշտաբար պետք է նպաստի երկրի տնտեսության զարգացմանը, բայց եթե Հայաստանի անդամակցությունը ԵՏՄ-ին պարբերաբար բերելու է շուրջ 800 անուն ապրանքների թանկացմանը, ապա անհրաժեշտություն է առաջանում քննարկել այդ միությունում Հայաստանի գտնվելու նպատակահարմարության հարցը, մանավանդ, որ ինտեգրացիոն այդ մոդելը հեռանկարներ չի ստեղծում Հայաստանի տնտեսության զարգացման համար:
Սրանք գլոբալ հարցեր էին, որոնք շրջանցվեցին խորհրդարանական այսօրվա լսումների ժամանակ: Մենք լսեցինք կառավարության ներկայացուցիչների դասախոսություններ հիշեցնող զեկույցները, ընդդիմադիր պատգամավորների միտինգային ելույթները, սակայն դրանցից հասարակության դարդն ու ցավը չպակասեց՝ ևս մեկ անգամ փաստելով, որ քաղաքական համակարգն անհուսալիորեն օտարված է հասարակությունից:
Լուսանկարը՝ Photolure-ի