Ոստիկանությունն ու ԱԱԾ-ն շարունակում են խուզարկել հունվարի 17-ի առավոտյան՝ ժամը 7-ի սահմաններում ձերբակալված, անցած տարի սեպտեմբերին Թուֆենկյան հյուրանոցի բակում հրազենային վիրավորում ստացած Ալավերդիում հայտնի քրեական հեղինակություն Վահագն Աբգարյանին՝ Ալավերդցի Վահագին պատկանող օբյեկտները։
«Առաջին լրատվական»-ի տեղեկություններով՝ այսօր զենք-զինամթերք հայտնաբերելու կասկածանքով խուզարկվել է Ալավերդցի Վահագին պատկանող «Կադիլակ» ավտոմեքենան։ Այնտեղից, սակայն, ոչ մի բան չի հայտնաբերվել, միայն մեկ զրահաբաճկոն։
Հիշեցնենք, որ Վահագն Աբգարյանին մեղադրանք է առաջադրվել հանցավոր համագործակցություն ստեղծելու և ղեկավարելու (ՀՀ քրեական օրենսգրքի 223-րդ հոդվածի 1-ին մաս), Կ.Փիրուզյանի սպանությունը կազմակերպելու (ՀՀ քրեական օրենսգրքի 38-104-րդ հոդվածի 2-րդ մասի 7-րդ և 8-րդ կետերով) և Ռ.Մոսինյանի սպանության նախապատրաստությունը կազմակերպելու համար (ՀՀ քրեական օրենսգրքի 38-35-104-րդ հոդվածի 2-րդ մասի 7-րդ և 8-րդ կետերով)։ Խոսքը գնում է անցած տարի Ալավերդիի շուկայի տարածքում կատարված սպանության մասին։
2017 թվականի հունիսի 13-ին՝ 12:10-ի սահմաններում, Ալավերդու կենտրոնական Թումանյան փողոցի ամենաբանուկ հատվածում՝ «Կատա» սուպերմարկետի շենքում գտնվող և մայրուղուն հարող ծաղկի խանութից արձակված հրազենային կրակոցներից սպանվել է Ալավերդի քաղաքի Զորավար Անդրանիկի 22 շենքի բնակիչ, 30-ամյա Կամո Փիրուզյանը: Կամո Փիրուզյանը շտապօգնության մեքենայով Ալավերդու բժշկական կենտրոնի հիվանդանոց տեղափոխելիս ճանապարհին մահացել էր։ Կամո Փիրուզյանին հրազենային կրակոցներով սպանող անձը տեղում հանձնվել էր ոստիկանությանը:
Կամո Փիրուզյանի սպանությունը Ալավերդիում 2016թ.-ի հունիսի 6-ի քաղաքապետի ընտրության ընթացքում սկսված «ռազբորկաների» շարունակությունն էր։
Նշենք նաև, որ Վահագն Աբգարյանն իրեն մեղավոր չի ճանաչում առաջադրված մեղադրանքում։