ՄԱՀՀԻ հիմնադիր, քաղաքագետ Ստյոպա Սաֆարյանի կարծիքով՝ որքան էլ Հայաստանը տեսք ընդունի, որ ՀՀ իշխանությունները ձևավորվում են առանց արտաքին գործոններ հաշվի առնելու՝ այժմ համաձայնեցումների փուլ է։ «Դրանք ուղղակի դեկլարատիվ հայտարարություններ են։ Նկատելի է, որ բոլոր նախագահները, այդ թվում՝ Սերժ Սարգսյանը, իրենց առաջադրումներից առաջ բոլոր մայրաքաղաքներն այցելել են՝ Մոսկվա, Վաշինգտոն, Փարիզ, Բրյուսել, արտգործնախարարների թեկնածությունները համաձայնեցվում են այդ կարևոր մայրաքաղաքներում նույնպես։ Այժմ չհերքելով օրակարգի հարցերի քննարկումը, կարծում եմ, որ նախագահի հարցը ևս կքննարկվի այդ այցի շրջանակներում՝ փորձելով ստուգել արձագանքները»,- «Առաջին լրատվական»-ի հետ զրույցում՝ անդրադառնալով Սերժ Սարգսյանի՝ Փարիզ, Ստասբուրգ կատարվող այցերին, ասաց Սաֆարյանը։
Մեր զրուցակցի դիտարկմամբ՝ Սերժ Սարգսյանի հնարավոր վարչապետության հարցը ևս քննարկվելու է կարևոր մայրաքաղաքներում։ Ի դեպ՝ Սաֆարյանը չի բացառում, որ Սերժ Սարգսյանը վարչապետ կդառնա ոչ թե ապրիլին, այլ մի քանի ամիս անց. «Ռուսաստանն այժմ մտահոգվելու առիթ չունի՝ առ այն, որ Հայաստանը կարող է հեռու փախչել, սրա օրինակներից մեկը ՀՀ-ԵՄ համաձայնագրի վերաբերյալ Մոսկվայի պաշտոնական դիրքորոշումն էր։ Այն, ինչ կարող է անել Ռուսաստանը՝ թանկացնել այն վճարը, որ Սերժ Սարգսյանը պետք է վճարի վարչապետի պաշտոնը ստանձնելու համար՝ նոր որոշումներ կորզել, նոր ակտիվներ ձեռք բերել կամ նոր զիջումներ ստանալ։ Հետևաբար, այս կտրվածքով անկանխատեսելի զարգացման մասին խոսք լինել չի կարող։ Հարցն այն է, թե ինչ հերթականությամբ ու ինչ էտապներով է Սերժ Սարգսյանը տեսնում վերջին կոմբինացիայի ավարտը»։
