ԱՄՆ-ի փոխնախագահ Մայքլ Փենսը հայտարարել Է, որ եկել Է իրանական միջուկային ծրագրի վերաբերյալ Գործողությունների համատեղ համապարփակ ծրագրի դրույթները փոխելու ժամանակը:
«Մենք միասին ենք դիմակայում ահաբեկչության գլխավոր հովանավոր հանդիսացող պետությանը՝ Իրանին: Նախագահ Թրամփի որոշումը՝ հայտարարելու, որ իր կողմից, Իրանի հետ միջուկային գործարքին համապատասխան, պատժամիջոցների չեղարկման երկարացումն ստորագրելը վերջինը կլինի, հստակ ազդանշան Է մեր եվրոպացի դաշնակիցներին առ այն, որ եկել Է համաձայնության մեջ փոփոխություններ մտցնելու ժամանակը,- ասել Է Փենսը հունվարի 23-ին Երուսաղեմում Իսրայելի նախագահ Ռեուվեն Ռիվլինի հետ բանակցությունների սկսելուց առաջ:-Իսկ եթե դաշնակիցները չանսան, նախագահ Թրամփը հստակ հասկանալ Է տվել, որ մենք անհապաղ դուրս կգանք իրանական ատոմի շուրջ համաձայնագրից»:
Փոխնախագահը հավելել Է, թե «հուսով Է՝ իրադրությունը կշտկվի առաջիկա ամիսներին, ինչն օգուտ կբերի տարածաշրջանի անվտանգությանը, Իսրայելի անվտանգությանը և ամերիկյան շահերի անվտանգությանը»:
Իսրայելի նախագահի դիվանատանը Փենսի ելույթի հեռարձակումը հունվարի 23-ին իրականացրել Է հրեական պետությունում ԱՄՆ-ի դեսպանությունը:
Իրանը և միջազգային բանակցորդների «վեցյակը» 2015 թվականի հուլիսի 14-ին պատմական համաձայնության են հասել իրանական բազմամյա միջուկային հիմնախնդրի կարգավորման շուրջ: Երկարատև բանակցություններն ավարտվել են Գործողությունների համատեղ համապարփակ ծրագրի ընդունմամբ:
2016 թվականի հունվարի 16-ին հայտարարվել Է ԳՀՀԾ-ի իրականացումն սկսելու մասին, որին հավանություն Է տրվել ՄԱԿ-ի Անվտանգության խորհրդի բանաձևով: Այդ ծրագիրը նախատեսում Է ավելի վաղ ՄԱԿ-ի ԱԽ-ի, ԱՄՆ-ի և Եվրամիության կողմից Իրանի նկատմամբ սահմանված տնտեսական ու ֆինանսական պատժամիջոցների վերացում: Փոխարենը Թեհրանը պարտավորվել Է սահմանափակել իր միջուկային գործունեությունը՝ այն դնելով միջազգային հսկողության ներքո: ԱՄՆ-ի ներկայիս վարչակազմը խստիվ քննադատում Է այդ համաձայնագիրը և սպառնում Է դուրս գալ դրանից՝ փաստաթուղթը համարելով «վատագույն գործարքը» ԱՄՆ-ի համար, հաղորդել Է ՏԱՍՍ-ը:
