Եվրոպական և մասնավորապես բրիտանական ֆուտբոլում իրականություն դարձավ ամենասպասված և նշանակալի տրանսֆերներից մեկը: Հայաստանի ազգային հավաքականի ավագ Հենրիխ Մխիթարյանը «Մանչեսթեր Յունայթեդից» տեղափոխվեց «Արսենալ»: Լոնդոնյան թիմի չիլիացի հարձակվող Ալեքսիս Սանչեսն էլ այսուհետ կկրի «Յունայթեդի» մարզաշապիկը: Երկրպագուները հույս ունեն Մխիթարյանին խաղադաշտում տեսնել արդեն վաղը՝ Անգլիայի Լիգայի գավաթի խաղարկության կիսաեզրափակչում՝ «Չելսիի» դեմ սկզբունքային մրցավեճում:
«Երազանքս իրականություն դարձավ և երջանիկ ուրախ եմ, որ ավարտեցինք այս գործարքը: Կանեմ առավելագույնն իմ նոր ակումբի համար, որպեսզի կերտենք պատմություն: Ինձ միշտ դուր է եկել «Արսենալի» խաղը: Դուր է եկել Արսեն Վենգերի մարտավարությունն ու նրա աշխատանքը երիտասարդ ֆուտբոլիստների հետ: Ժամանակին ուղղակի հիանում էի Թիերի Անրիի խաղով: Կարծում եմ հենց դա էր պատճառը, որ երկրպագում էի լոնդոնյան թիմին: Անրին շատ գոլեր էր խփում՝ միևնույն ժամանակ խաղալով թիմային ֆուտբոլ: Նա թիմի հերոսն էր :«Արսենալի» այն երկրպագուները, որոնք շատ բան չգիտեն իմ մասին, հուսով եմ, որ կարծիք կկազմեն դաշտում իմ խաղը տեսնելուց հետո: Որևէ նախասիրություն չունեմ դիրքիս վերաբերյալ: Սիրում եմ տեղաշարժվել դաշտում, փնտրել ազատ գոտիներ: Ինչ վերաբերվում է նոր թիմակիցներիս, ապա ցանկանում եմ խաղալ բոլորի հետ և սկսել մարզումները որքան հնարավոր է շուտ»,- պայմանագիրը կնքելուց հետո ասել էր Մխիթարյանը՝ «Արսենալի» պաշտոնական կայքի թղթակցի հետ զրույցում:
Այսօր շատ են քննարկումները Մխիթարյանի տրանսֆերի վերաբերյալ: Ոմանք հայ ֆուտբոլիստի Լոնդոն տեղափոխվելը որակում են նահանջ, ոմանք՝ լուրջ ձեռքբերում: «Հենրիխ Մխիթարյանի տեղափոխությունը «Արսենալ» սենսացիոն է: Ես հայ ֆուտբոլիստի մեծ երկրպագուն եմ և նրա խաղին հետևում էի դեռ այն ժամանակ երբ խաղում էր Դորտմունդում:«Բորուսիայում» Մխիթարյանը շատ գոլեր էր խփում և ճանաչվեց մրցաշրջանի լավագույն խաղացող:Իրականում շատ դժվար է Մխիթարյանի մակարդակի ֆուտբոլիստ գտնել հունվարին: Կարող եմ ասել, որ Մխիթարյանը Պրեմիեր լիգայի լավագույն ֆուտբոլիստներից է»,- հայտարարել էր «Արսենալի» նախկին ֆուտբոլիստ Փոլ Մերսոնը: Վերջինս այս հայտարարությունը առիթ է հանդիսացել, որ բրիտանացի լրագրողները Մխիթարյանի տրանսֆերը որակեն սենսացիոն: Այսօր «Մանչեսթեր Յունայթեդի» շատ ֆուտբոլիստներ իրենց միկրոբլոգերում հաջողություն են մաղթել հայ ֆուտբոլիստին:
Ուշագրավ է, որ հրապարակումներ կատարած «Յունայթեդի» ֆուտբոլիստների զգալի մասը Մխիթարյանին անվանել են եղբայր: «My bro good luck. I will miss you»,-գրել է «Յունայթեդի» հարձակման առաջատար Ռոմելու Լուկակուն: Վերջինի այս գրառումը սոցցանցերի հայ օգտատերերի կողմից այս կերպ է թարգմանվել․ «Ապ ջան հաջող, քեզ շատ կկարոտեմ»: «Արսենալի» խաղացող Հեկտոր Բելյերինն էլ իր միկրոբլոգում բարի գալուստ է մաղթել Մխիթարյանին. «Բարի գալուստ քո նոր տուն»,- գրել է Բելյերինը:
Մխիթարյանի վերաբերյալ սոցցանցերում զետեղված գրառումները վկայում են, որ մեծ վարպետ լինելուց բացի մեր հավաքականի ավագը նաև խիստ դրական կերպար է:Այսօր դժվար է գտնել մի ֆուտբոլիստի, որը կհայտարարի, որ խաղային դիրքի առումով նախասիրություն չունի: Նման հայտարարություն իրեն կարող են թույլ տալ այն ֆուտբոլիստները, որոնք պատրաստ են թիմին օգուտ տալ խաղային գրեթե բոլոր դիրքերում:
Բնական է, որ Մխիթարյանին շատ ավելի հաճելի է խաղալ հարձակման գծում, բայց «Արսենալ» տեղափոխվելուն պես մեր ֆուտբոլիստը պատրաստակամություն հայտնեց խաղադաշտում կատարել ծանր և դժվար աշխատանք: «Մխիթարյանն ունիվերսալ ֆուտբոլիստ է: Նա գոլային պահեր ստեղծելուց բացի միևնույն ժաամանակ լավ պաշտպանվում, կարողանում է տարածություններ հաղթահարել: Խաղադաշտում նա ներդնում է ողջ ներուժը: Վստահաբար կարող եմ ասել, որ Մխիթարյանը այն ֆուտբոլիստն է, որն ունի պրոֆեսիոնալին հատուկ հնարավոր բոլոր դրական որակները: Տևական ժամանակ հետևելով Մխիթարյանին կարող եմ ասել, որ նա ավելի արդյունավետ է խաղում եզրերում կամ կիսապաշտպանության կենտրոնում: Հենրիխը կարող է Օզիլի հետ խաղալ որպես փլեյմեյքեր, ուստի նրա տեղափոխությունը լավ քայլ էր:Հնարավոր է, որ Մխիթարյանն այնքան էլ հաճախ չի դառնում գոլի հեղինակ, սակայն նա բարելավել է այդ ցուցանիշը: Եթե դիտեք կարիերայի ընթացքում նրա խփած գոլերի թիվը, ապա դա բավականին տպավորիչ է»,- հայտարարել է Արսեն Վենգերը:
