Երևի Սերժ Սարգսյանի ասածի իմաստը եղել է այն, որ այսօրվա քաղաքական զարգացումներին Արմեն Սարգսյանը չի մասնակցում և կարող է լինել անկողմնակալ։ Այդ մասին «Առաջին լրատվական»-ի հետ զրույցում նշեց նախկին վարչապետ, Սլավոնական համալսարանի ռեկտոր Արմեն Դարբինյանը՝ անդրադառնալով Սերժ Սարգսյանի հայտարարությանը, թե ՀՀ նախագահը չպետք է զբաղված լինի քաղաքականությամբ։
Դիտարկմանը, թե արդյոք դրանով չենք ապաքաղաքականացնում նախագահի ինստիտուտը, Արմեն Դարբինյանը պատասխանեց. «Ես չեմ կարծում, որ Արմեն Սարգսյանը քաղաքականության հետ քիչ կապ ունի։ Շատ մեծ կապ ունի և կունենա։ Նախագահի բառերին միակողմանի չի կարելի մոտենալ, որ քաղաքականության հետ կապ չպետք է ունենա։ Խոսքը տվյալ քաղաքական իրավիճակի, իրադարձությունների մեջ անձի մասնակցության մասին է՝ արդյո՞ք անձը կարող է լինել անկողմնակալ, թե՞ ոչ։ Տվյալ դեպքում՝ այո, կարող է։ Այսինքն՝ նախագահի ասածին դուք վերաբերվեք հենց այդ տեսանկյունից։ Քաղաքականության հետ կապ չունեցող մարդը ո՞նց կարող է ՀՀ նախագահ աշխատել։ Դա անգամ Սահմանադրությամբ նախատեսված չէ»։
Արմեն Դարբինյանը նաև նշեց, որ ինքը կուսակցության անդամ է եղել, սակայն հիմա սառեցրել է իր անդամակցությունը, քանի որ աշխատում է մանկավարժության և գիտության ոլորտում. «Արմեն Սարգսյանը երևի կուսակցական չի եղել, բայց դա էլ կապ չունի, որովհետև խոսքն ընթացիկ քաղաքական գործընթացներում մարդու ներգրավված լինելու մասին է, կարո՞ղ է մարդը լինել արբիտրի դերում, թե՞ ոչ։ Արմեն Սարգսյանը ներգրավված չէ այդ գործընթացներում»,- ընդգեց Դարբինյանը։
Անդրադառնալով ապրիլին սպասվող փոփոխություններին և դիտարկմանը, թե հնարավոր է հանրությունը պոռթկա, եթե վարչապետի պաշտոնում առաջադրվի Սերժ Սարգսյանը, նախկին վարչապետն ասաց. «Ես նման պոռթկման համար նախադրյալ չեմ տեսնում։ Սերժ Սարգսյանը կուսակցության ղեկավար է, որը ստացավ մեծամասնություն ընտրությունների ժամանակ, ինչու պետք է հանրությունը պոռթկա: Մի սպասեք պոռթկումներ, մի ակնկալեք, դրանով, կարծեք թե, դուք կանչում եք պոռթկումը։ Պետք չի մեր երկրին դա։ Մեզ զարգացում է պետք։ Սերժ Սարգսյանը 30 տարվա, եթե ոչ ավելի, քաղաքական փորձառություն ունեցող մարդ է»։
Հարցազրույցն ամբողջությամբ՝ տեսանյութում: