Կարծես թե բացահայտվում է, թե որն էր Ռուսաստանի փոխվարչապետ Դմիտրի Ռոգոզինի` Բաքու կատարած տարեվերջյան խորհրդավոր այցի հիմնական շարժառիթը: Ադրբեջանի պաշտպանության նախարարությունը հաղորդագրություն և նաև կադրեր է տարածել, որոնք բացահայտում են, որ Կասպից ծովով Բաքու է հասել ռուսական սպառազինության նոր խմբաքանակ: Խոսքը БТР-82А զրահամեքենաների մասին է:
Ադրբեջանի պաշտպանության նախարարությունը տեղեկացնում է, որ խոսքը ժամանակակից և մարտունակ զրահատեխնիկայի մասին է, որը 2016-ի պատերազմի ժամանակ օգտագործվել է հայկական ուժերի դեմ` վերջիններիս պատճառելով մեծ կորուստներ, այդ թվում` մարդկային: Պաշտոնական աղբյուրը տեղեկացնում է նաև, որ ստացված նորագույն սպառազինությունն անմիջապես ուղարկվելու է հայ-ադրբեջանական շփման գոտի:
Ռուսաստանի քաղաքականությունն` այսպիսով, չի փոխվում և, մեծ հաշվով, ուղղված է ԼՂ հակամարտության մենեջմենտի իրականացմանը` տարածաշրջանը միլիտարիզացնելու ճանապարհով, ինչը ցանկացած պահի կարող է հանգեցնել լայնածավալ պատերազմական գործողությունների վերսկսմանը:
Մոսկվան առնվազն չի բացառում նման հեռանկարը և բոլոր հիմքերն ունենք կարծելու, որ կախված քաղաքական կոնյուկտուրայից` Ադրբեջանը Մոսկվայից կարող է ստանալ նոր պատերազմի սանձազերծման քարտ-բլանշ, մանավանդ, որ վերջին օրերին Վլադիմիր Պուտինը հանդես է եկել ուղերձով, որտեղ բացահայտել է ԵՏՄ-ն ընդարձակվելու իր պլանը` ԱՊՀ երկրների հաշվին: Սա ինքնին նոր հեռանկարներ է բացում ռուս-ադրբեջանական նոր գործարքների համար:
Հրապարակային քաղաքականության մակարդակում Մոսկվան, կարծես թե, ներդաշնակ է գործում մյուս երկու համանախագահների հետ` փորձելով շփման գծում ամրապնդել ստատուս-քվոն ու կայունությունը, սակայն իրական քաղաքականության մակարդակում սպառազինում է Ադրբեջանին` նոր ռազմական գործողությունների վերսկսումը դարձնելով ժամանակի խնդիր: Այս ֆոնին Հայաստանի իշխանության լռությունը, դիվանագիտական անգործությունն առնվազն անհամարժեք է:
Մյուս կողմից` Երևանում գուցե կարծում են, որ Ռուսաստանին հակադրվելու ռեսուրս չունեն և փորձում են արտաքին քաղաքականության դիվերսիֆիկացման ճանապարհով լուծել Հայաստանի և Արցախի անվտանգության խնդիրը: Սա, իհարկե, նույնպես ճանապարհ է, սակայն, անկեղծ ասած, առայժմ տեսանելի չեն Հայաստանի նոր քաղաքականության որակական դրսևորումները` նույնիսկ այն պարագայում, երբ ստորագրված է Հայաստան-Եվրամիություն համաձայնագիրը:
Ավելին, Ադրբեջան ռուսական սպառազինությունների նոր խմբաքանակի մատակարարման և Երևանի լռության ֆոնին tert.am-ին ծավալուն հարցազրույց է տվել Արցախի Հանրապետության նախագահի մամուլի խոսնակ Դավիթ Բաբայանը և ասել է, թե Ռուսաստանի՝ Ադրբեջանի հետ հարաբերությունները խորացնելը չպետք է դիտել որպես հակահայկական քայլ: Թող խորացնեն, միգուցե, դա ավելի կնպաստի, որպեսզի կայուն լինի իրավիճակը` ասել է նա:
«Հիմա Ռուսաստանը, բանական է, ուզում է, որ իր սահմանների երկայնքով իր համար բարիդրացիական մթնոլորտ ձևավորվի: Եթե Ադրբեջանի հետ է զարգացնում իր հարաբերությունները, ի՞նչ է, նա մեր շահերի՞ց պետք է ելնի: Կամ` մենք պետք է ինչ-որ երկրի շահերի՞ց ելնենք մեր հարաբերությունները տարբեր երկրների հետ խորացնելու համար»,- նշել է նա:
Դավիթ Բաբայանը համոզված է, որ անկախ Ադրբեջանը, միևնույն է, չի կարող լինել Ռուսաստանի դաշնակիցը: Ակամայից այնպիսի տպավորություն է, որ գործ ունենք ոչ թե ազատության համար պայքարող Արցախի իշխանությունների, այլ` ռուսական ռազմաարդյունաբերական համալիրի ներկայացուցիչի հետ, ով ամեն կերպ արդարացնում է սպառազինությունների մատակարարումն Ադրբեջանին: Ի՞նչ հիմքով է Բաբայանը դրական և կայունացնող համարում ռուս-ադրբեջանական հարաբերությունների խորացումը, եթե մատակարարված սպառազինության թիրախը առաջնագծում կանգնած հայ զինվորներն են, որոնք պարբերաբար դառնում են ադրբեջանական ագրեսիայի ու սադրանքի զոհերը:
Ինչպե՞ս կարող է Արցախը հասնել միջազգային ճանաչման, երբ ունի նման որակի իշխանություններ, որոնց քաղաքականությունը, վարքագիծը միանգամայն տեղավորվում են ռուսական համատեքստում` ԼՂՀ-ն նույնացնելով Աբխազիայի, Հարավային Օսեթիայի կամ Մերձդնեստրի հետ: Միևնույն ժամանակ` Դավիթ Բաբայանը մարմնավորում է այսօրվա հայկական քաղաքական միտքը, որն անհուսալիորեն վարակված է ռուսական վիրուսով և դարձել է հայ ժողովրդի բոլոր դժբախտությունների ու փորձությունների պատճառը: Ժամանակները փոխվում են, սակայն մենք դասեր չենք քաղում: