«Այսօրվա դրությամբ ունենք այդ 7 տարվա ուղենիշը դրված և այս իմաստով Զինված ուժերը փորձելու են մշակել, թե ինչ ուղղություններով պետք է զարգանան․ հասկանալի է, որ այդ ուղղությունները չեն վերաբերելու միայն սպառազինություններին։ Պետք է նաև հասկանանք, որ անվտանգությունն այլևս միայն զինվորին չի պատկերացնում, այլև կրթական համակարգի բաղադրիչն է, սոցիալական ապահովության բաղադրիչն ունի, ինչպես նաև տեղեկատվական, ռազմաարդյունաբերության և այլն․ այս ամբողջ կոմպլեքսի մեջ մշակվում է մի ծրագիր, որը, բնականաբար, կունենա իր բաց և փակ կողմերը, ինչը վերջնական քննարկումներից հետո կներկայացվի նաև հանրության դատին։ Հավելեմ նաև, որ սա չի լինելու միայն այսպես ասած՝ քարի վրա դաջվածք, այլ լինելու է փաստաթուղթ, որը միշտ պատրաստ է լինելու նոր գաղափարներ լսելու, դրանք զարգացնելու, վերամշակելու և իրագործելու»,- «Առաջին լրատվական»-ի հետ զրույցում նշեց Մարդկային զարգացման միջազգային կենտրոնի գործադիր տնօրեն, ԱԺ նախկին պատգամավոր Թևան Պողոսյանը՝ անդրադառնալով ՀՀ ԶՈՒ արդիականացման յոթամյա ծրագրի վերաբերյալ ընթացող քննարկումներին։
Վերջինիս կարծիքով՝ միշտ պետք է ճկուն լինենք՝ համապատասխան ժամանակներում փոփոխություններ անելու համար և ունակ լինենք ճիշտ կանխատեսումներ անելու։
«Հին պատերազմներին պատրաստվելու ժամանակն այլևս անցել է․ այս ամենը պետք է գիտակցենք և ապագայում այլևս դրանով պետք է առաջ շարժվենք՝ թույլ չտալով Ադրբեջանին նույնիսկ կես վայրկյան անգամ մտածել, թե ինքը կես միլիմետրով մեզանից ավելի է»,-հավելեց Պողոսյանը։
Հարցին՝ այս ծրագրով առաջնագծում հեռահար կառավարում ունենալ նախատեսվո՞ւմ է, թե՞ ոչ, բանախոսը պատասխանեց․
«Ես չեմ կարող հիմա փակագծերը բացել, թե ինչ է նախատեսվում, ինչը՝ ոչ, սակայն պետք է հասկանանք, որ եթե մի բանի մասին խոսվում է, ապա այդպիսի պրոբլեմ եղել է․ թե կառավարման ինչ մեխանիզմներ են այնտեղ դրվելու՝ այդ ամենը կախված է մեր եղած ռեսուրսներից, հնարավորություններից և դրա հետ միասին նաև այն մոտեցումներից, որոնք կկարողանանք կանխատեսել և նախագծել, այսօրվա դրությամբ՝ արդեն իսկ դիվերսիաները կանխարգելելու մասով մենք առաջընթաց ունենք»։
Մանրամասները՝ տեսանյութում։