«Որպես փաստաբան, իհարկե, մտահոգված եմ դատական օրենսգրքի նոր նախագծում տեղ գտած փաստաբանների համար տուգանքի չափով, բայց հիմնական խնդիրը, իմ կարծիքով, կապված է դատավորների անկախության հետ»,-«Առաջին լրատվական»-ի հետ զրույցում ասաց փաստաբան Հայկ Ալումյանը։ Նրա խոսքով, Հայաստանում ընդունված է խոսել դատական իշխանության անկախության մասին, բայց կարևորը դատավորի անկախությունն է, քանի որ եթե դատավորը ինքը անկախ չլինի, իր դատական ակտերը կայացնելիս իրեն անկախ չզգա, մենք կունենանք այն վիճակը, որը այսօր կա։
Ալումյանի խոսքով մի բան է հայտարարել, թե դատավորը անկախ է, ենթարկվում է օրենքին, որևէ ճնշում նրա մասնագիտական գործունեության հետ կապված չկա, այլ բան է այդ ուղղությամբ իրական երաշխիքներ ստեղծելը։
Ինչ վերաբերում է դատավորի կողմից փաստաբանների նկատմամբ տուգանք կիրառելու վերաբերյալ դրույթին, Ալումյանը նշեց, որ իրենք անելու են բոլոր հնարավոր քայլերը հասնելու նրան, որ դրույթը տեղ չգտնի օրենքի վերջնական տեքստում։ Սակայն, եթե օրենքի տեսք ստանա այդ դրույթը, ապա մի փաստաբանի նկատմամբ այն կկիրառվի մի օր և նա կդիմի Սահմանադրական դատարան։ Իսկ եթե այդտեղ էլ հաջողության չհասավ, կդիմի ՄԻԵԴ։ «Միևնույնն է մենք կհասնենք դրան։ Հարցը միայն այն է, թե ինչ ջանքերով և ինչ կորուստներով ՀՀ-ի համար»,-նշեց Ալումյանը։
Առավել մանրամասն՝ տեսանյութում
