«Կառավարությունն իր քաղաքականությամբ և հատկապես նոր մշակված ռազմավարությամբ էապես կարևորում է կայուն զարգացման նպատակների ու սահմանված թիրախների իրականացումը և փորձում է ապահովել բարելավված ցուցանիշների առկայություն․խոշոր ծրագրերից մեկը, որը մեր երկրում իրականացվում է դա ընտանիքի կենսամակարդակի բարձրացմանն ուղղված, նպաստների բարձրացմանն ուղղված ծրագիրն է, որի համակարգում ընդգրկվածների 80 տոկոսը երեխաներ ունեցող ընտանիքներն են և նրանց տրված գումարի 62 տոկոսն այդ ընտանիքը ծախսում է զուտ սնունդ ձեռք բերելու վրա»,- «Առաջին լրատվական»-ի հետ զրույցում նշեց ՀՀ աշխատանքի և սոցիալական հարցերի նախարարի տեղակալ Շամամ Հարությունյանը՝ խոսելով Հայաստանի բնակչության թերսնման մակարդակի և այս առումով կառավարության մշակած ռազմավարության արդյունքների մասին։
Վերջինիս տեղեկացմամբ՝ այս առումով ամենախոցելի մարզերն են Շիրակը, Լոռին և Գեղարքունիքը և հենց այս մարզերից էլ ընտրվել են ամենամեծ թվով նպաստառու ընտանիքներ ունեցող համայնքները․ սոցիալական ապահովության փորձնական ծրագիրն իրականացվելու է հենց այդ համայնքներում՝ հաշվի առնելով նաև այդ համայնքների գյուղատնտեսական զարգացման հնարավորությունները։
«Վերջին տարիներին թերսնման մակարդակը մի քանի անգամ իջել է, այսինքն կառավարության կողմից ջանքեր այս ուղղությամբ գործադրվում են, սակայն դա բավարա՞ր է ՝ իհարկե ոչ , քանի որ կա սննդի բևեռացվածություն մեր երկրում, ինչպես նաև կա սննդի կալորիաների հետ կապված խնդիրներ․ գյուղատնտեսության նախարարությունը նույնպես պետք է հաշվի առնի առանձին ապրանքատեսակների գծով գնաճը և զարգացնի հատկապես տեղական արտադրությունը, դա մսամթերքի արտադրությունն է, կարագի արտադրությունն է և նման այլ ապրանքատեսակների»,-հավելեց փոխնախարարը։
Մանրամասները՝ տեսանյութում։
