«Ես ի սկզբանե դեմ եմ եղել այդ արձանագրություններին և հիմա շատ ուրախ եմ, որ դրանք փակուղի մտնելուց բացի՝ օրակարգից ընդհանրապես պետք է հանվեն․ մենք դա ավելի շուտ պետք է անեինք և կարծում եմ, որ հայ-թուրքական հարաբերություններում արժանապատվությունը պետք է դառնա մեր գործելակերպի գլխավոր մասը․ այդ արձանագրություններում կային բազմաթիվ կետեր, որոնք իմ խորին համոզմամբ՝ հակահայկական բնույթ ունեին և բխում էին միայն Թուրքիայի շահերից»,- «Առաջին լրատվական»-ի հետ զրույցում նման համոզմունք հայտնեց ՀՀ ԳԱԱ պատմության ինստիտուտի տնօրեն Աշոտ Մելքոնյանը՝ անդրադառնալով ՀՀ արտաքին գործերի նախարար Էդվարդ Նալբանդյանի այն հայտարարությանը, թե գարունը Հայաստանը կդիմավորի առանց հայ-թուրքական արձանագրությունների։
Հիշեցնենք, որ նման հայտարարությամբ Էդվարդ Նալբանդյանը հանդես է եկել 2017թ-ի տարեվերջին՝ Հունաստանում։
Աշոտ Մելքոնյանի կարծիքով՝ այս արձանագրություններն արդեն այնքան են հնացել, որ Հայաստանի իշխանությունները մեկ անգամ ևս ի ցույց աշխարհի ուզում են փաստել այն հանգամանքը, որ Հայաստանը հայ-թուրքական հարաբերությունների նորմալացման կողմնակից է եղել և դրա ձախողման հիմնական պատճառը թուրքական կողմն է եղել։
«Այս հարցին հնչեղություն տալու իմաստով հենց Ապրիլի 24-ի նախօրյակին է նման բան ասվում․ վերհիշեք, որ տարիներ առաջ հայ-թուրքական արձանագրությունների սառեցումը դարձյալ Հայոց ցեղասպանության տարելիցի նախօրյակին եղավ և հիմա էլ կրկին ապրիլի 24-ի նախօրյակին է այդպիսի քայլ արվում, ինչը կարծում եմ, որ կապված է դրա հետ։
Մյուս կողմից էլ՝ Ցեղասպանության և հայ-թուրքական հարաբերությունների հետ կապված այս շատ զգայուն խնդիրը չեմ բացառում, որ կարող է իշխանությունների կողմից լինել քայլ` ուղղված ներքին հանրությանը՝ իր իմիջը բարձրացնելու նպատակով»,- հավելեց բանախոսը։
Մանրամասները՝ տեսանյութում։