Վերլուծաբան Լևոն Մարգարյանի կարծիքով՝ «Ելք» դաշինքի հրավիրած երթը բազմամարդ չէր և դա պայմանավորված էր այն թիրախային լսարանով, որ ունի դաշինքը և այն խնդիրներով, որ «Ելք»-ը դրել էր իր առաջ: «Փաստացի, դաշինքը կամ լավ խորամուխ չէր եղել, թե ինչպիսի էլեկտորատ ունեն իրենք, կամ էլ այս քայլը պայմանավորված էր նրանով, որ այս ակտիվ ներիշխանական դասավորումները ստեղծել են մի իրավիճակ, որ «Ելք»-ը, փաստացի, որպես քաղաքական սուբյեկտ, իրադարձություններից դուրս է մնում։ Ցանկացած այսպիսի իրադարձություն շատ լավ առիթ է հիշեցնելու, որ իրենք կան, ակտիվ են, հետաքրքրված են հասարակական խնդիրներով»,- «Առաջին լրատվական»-ի հետ զրույցում ասաց Մարգարյանը։
Լևոն Մարգարյանի դիտարկմամբ՝ երթը որպես մեդիաիրադարձություն, հաջողված էր, որպես փողոցային դրսևորում՝ ավելի էմոցիոնալ ու որոշակի քաղաքական ազդեցություն ունեցող երթեր տեսել ենք այլ ուժերի նախաձեռնությմաբ. «Այն, որ Նիկոլ Փաշինյանը հայտարարում էր, որ սա շարունակական է լինելու, օգտագործելու են նաև խորհրդարանական հարթակը՝ ցույց է տալիս, որ իրենք այս թեմայի վրա փորձելու են հասարակական տրամադրություններ եփել, կապիտալ ստեղծել»։