Լուրեր
«Փորձ է արվում փաստաբանների ֆիզիկական ներկայությամբ լեգիտիմացնել իրենց ապօրինի դատական պրոցեսները»
  • 15:41
  • 2018-01-19
  • Դիտումներ՝ *

«Փորձ է արվում փաստաբանին դարձնել սիմվոլ դատական նիստերի դահլիճում, նրան թելադրել, թե ինչ պետք է անի։ Ցանկանում են, որ մենք ապահովենք ֆիզիկական ներկայություն և դրանով լեգիտիմացնենք իրենց ապօրինի դատական պրոցեսները»,- այսօր լրագրողների հետ հանդիպման ժամանակ ասաց փաստաբան Գրիշա Բալասանյանը։

Նա նշեց, որ անկախ ամեն ինչից՝ չեն պատրաստվում ենթարկվել այդ կանոններին։ Փաստաբանի ինստիտուտն անկախ է, և իրենք պայքարելու են այդ ինստիտուտի ազատականացման համար: «Եթե համակերպվենք ու լռենք, նշանակում է՝ մենք դրանով թաղելու ենք փաստաբանական ինստիտուտը, մենք չենք ուզում նմանվել դատական համակարգին, որտեղ վերևներից են պատվեր իջեցնում, ուզում ենք պահպանել մեր անկախությունը»,- ասաց Բալասանյանը:

Տիգրան Հայրապետյանն էլ նշեց, որ ոչ թե փաստաբանները պաշտպանության կարիք ունեն, այլ օրենքն ու արդարությունը, դատարաններն ուղղակի անտեսում են օրենքը. «Փորձ արվեց, որ հեղինակազրկվի պաշտպանի օգտակարությունը, փաստաբանական ինստիտուտը: Դատարանները հանրային պաշտպաններին ձևականորեն ընդունում են որպես ամբաստանյալի պաշտպան, այն դեպքում, երբ վերջիններս հրաժարվել են նրանց պաշտպանությունից: Դատարանները ձևականորեն ստիպեցին, որ այդ փաստաբաններն ուղղակի ներկա գտնվեն դատական դահլիճում, ծանոթ չլինելով գործի նյութերին՝ փորձեցին պաշտպանություն իրականացնել»:

Առավել մանրամասն՝ տեսանյութում:

 

  • Դիտումներ՝ *