Արցախի ԱԳՆ ողջունում է կոնգրեսմեն Ֆրենկ Փալոնեի ներկայացրած «ԱՄՆ-Արցախ. այցելություններ եւ շփումներ» օրինագիծը, որն ուղղված է Արցախի եւ ԱՄՆ միջեւ կապերի հաստատմանը եւ ԱՄՆ պաշտոնատար անձանց՝ Արցախ այցելության հարցում առկա արհեստական խոչընդոտների վերացմանը։
Նման կարծիք է հայտնել Արցախի ԱԳՆ-ի մամուլի քարտուղար Անի Սարգսյանի News.am գործակալությանը տված մեկնաբանությունում:
«Պատասխան՝ ողջունում ենք կոնգրեսմեն Ֆրենկ Փալոնեի ներկայացրած «ԱՄՆ-Արցախ. այցելություններ եւ շփումներ» օրինագիծը, որն ուղղված է Արցախի եւ ԱՄՆ միջեւ կապերի հաստատմանը եւ ԱՄՆ պաշտոնատար անձանց՝ Արցախ այցելության հարցում առկա արհեստական խոչընդոտների վերացմանը»,- ասել է նա։
Սարգսյանը համոզմունք է հայտնել, որ երկու պետությունների պաշտոնական ներկայացուցիչների փոխադարձ այցելությունները, մեր երկրների միջեւ ուղղակի եւ բաց երկխոսության հաստատումը կնպաստեն տարածաշրջանում գոյություն ունեցող խնդիրների լուծմանը։ «Միջազգային համագործակցությունը՝ հիմնված ներգրավման, այլ ոչ բացառման սկզբունքի վրա, նույնպես տարածաշրջանում լարվածության թուլացման կարեւոր գործոններից մեկն է»,- նշել է նա։
Միեւնույն ժամանակ Արցախը, ըստ Սարսգյանի, ակնկալում է, որ կոնգրեսական Փալոնեի նախաձեռնությունը լայն աջակցություն կգտնի ԱՄՆ Կոնգրեսում եւ նոր ազդակ կհաղորդի Արցախի եւ ԱՄՆ-ի միջեւ հարաբերությունների զարգացմանը։
Ավելի վաղ Ֆրենկ Փալոնեն հայտնել էր, որ Արցախում գործում է հաջողակ ժողովրդավար կառավարություն եւ ոչինչ չպետք է խանգարի ԱՄՆ եւ այլ երկրների հետ համագործակցությանը: «Սեպտեմբերին Արցախում ես նորից հսկայական առաջընթաց տեսա, որին Արցախը հասել է վերջին մի քանի տարիներին: Մյուսները նույնպես պետք է հնարավորություն ստանան տեսնել այդ ամենը, ինչպես ես: Փոխարենն Արցախի պես արագ զարգացող երկրներին խանգարելուն, ԱՄՆ-ն պետք է ընդունի եւ աջակցի նրանց պաշտոնական քայլերով»,- նշել է Փալոնեն:
Բանաձեւում ԱՄՆ կոնգրեսի անդամը նշել է ԱՄՆ պաշտոնյաներին Արցախ այցելելու թույլտվություն տալու անհրաժեշտության, արցախցի գործընկերների հետ ուղիղ կապեր հաստատելու մասին: