Facebook սոցցանցի համահիմնադիր և ղեկավար Մարկ Ցուկերբերգը 2017 թվականի սեպտեմբերին Մոնակոյում 150 մլն դոլար արժողությամբ զբոսանավ է գնել, հայտնում է Hürriyet Daily News-ը։
Ինչպես գրում է պարբերականը՝ հղում անելով անանուն աղբյուրին, Ulysses անունով նավի երկարությունը կազմում է 107 մետր։ Զբոսանավը նախատեսված է 30 հյուրի համար, ովքեր կկարողանան տեղավորվել լյուքս դասի 15 խցերում։ Զբոսանավը սպասարկում է անձնակազմի 42 անդամ։
Շքեղ զբոսանավում առկա են ճաշարանային 8 գոտիներ և 5 բար։ Տախտակամածին կա նաև ուղղաթիռային հարթակ և ավտոտնակ՝ մեքենաների ու մոտոցիկլետների համար։ Հյուրերը կարող են օգտվել լողավազանից, կինոթատրոնից, մարզասրահից, ինչպես նաև սպա սրահից։
33-ամյա միլիարդատիրոջ ներկայացուցիչը TechCrunch-ի հետ զրույցում հերքել է գործարքի մասին տեղեկությունը՝ հայտնելով, որ Ցուկերբերգը զբոսանավ չի գնել։
Ավելի վաղ հաղորդվել էր, որ Ցուկերբերգը 2.9 մլրդ դոլար է կորցրել Facebook-ի նորությունների ժապավենում փոփոխությունների մասին հայտարարելուց հետո։
