ԱՄՆ նախկին նախագահ Բարաք Օբաման կարող է 2018 թվականին վերադառնալ քաղաքականություն։ Այս մասին հայտնում է Newsweek-ը՝ հղում անելով պետության նախկին ղեկավարին մոտ աղբյուրներին։
«Այն բանից հետո, երբ Օբաման լքել է Սպիտակ տունը, ողջ տարվա ընթացքում նա շատ զբաղված է եղել։ Նա մեծամասամբ ջանացել է չերևալ հանրությանը»,-հայտնում է պարբերականը։
Չի բացառվում, որ այս տարվա ընթացքում Օբաման ակտիվ մասնակցություն կունենա երկրի քաղաքական կյանքում, որպեսզի օգնի Դեմոկրատական կուսակցությանը վերադարձնելու նախկին ժողովրդականությունը։
2017 թվականի ընթացքում նա ճանապարհորդել է, հազվադեպ մասնակցել տարբեր միջոցառումների։ Նա ելույթներում ջանացել է չհիշատակել ներկայիս նախագահի անունը՝ նշելով միայն, որ «ներկայում ԱՄՆ-ում արտասովոր ժամանակներ են»։ Նա քննադատել է կլիմայի հարցով փարիզյան համաձայնագրից դուրս գալու և իր նախաձեռնած առողջապահական ծրագիրը տապալելու նախագահի որոշումները։
Ինչպես նշում է պարբերականը՝ պաշտոնը լքելուց հետո 1 տարվա ընթացքում ամերիկացիների շրջանում Օբամայի վարկանիշն աճել է՝ հասնելով 60 տոկոսի։