«Քաղաքական գործընթացը փողոցային և ոչ փողոցային պայքարի բաժանելու տարբերակները մեզ մոտ դարձել են պայմանականություններ, որոնցով մենք գործընթացի մասին պատկերացում ենք կազմում՝ մի կողմ թողնելով բովանդակությունը։ Հիմա բովանդակությունը պարզ չէ։ «Ելք»-ը կատարել է առաջին քայլը՝ հայտարարել է, որ թանկացումների դեմ բողոքի ակցիա է կազմակերպում, բայց պարզ չէ այդ հարցի հեռահարությունը՝ կա՞ն պլաններ, երբ այս տարբերակն է լինում, բազմամարդության կամ ոչ բազմամարդության դեպքում ի՞նչ տարբերակներ կան»,- «Առաջին լրատվական»-ի հետ զրույցում ասաց քաղաքական մեկնաբան Հակոբ Բադալյանը։
Մեր զրուցակիցը հավելում է՝ հստակ չէ, թե որն է «Ելք»-ի ստրատեգիան, տնտեսական ի՞նչ պահանջներ են ներկայացվում կառավարությանը. «Գնաճի դեմ պայքարը աբստրակտ բան է, Սերժ Սարգսյանն էլ իր խորհրդակցության ժամանակ էր նման բան պահանջում՝ այդպես էլ կոնկրետ չասելով, թե ինչ պետք է արվի։ Պետք է տարբերություն լինի, ընդդիմությունը պետք է ասի՝ ինչ քայլեր է պահանջում, մեծ հաշվով, հարկային օրենսգրքի փոփոխությունն էլ լուծում չէ։ Քաղաքական գործըթնացը այստեղ պետք է լինի՝ չկա, իսկ փողոցում և խորհրդարանում ինչ կկատարվի՝ դառնում է երկրորդական»,- ասաց Բադալյանը։
Հակոբ Բադալյանի խոսքերով՝ մարդկանց մոտ կա փոփոխության պահանջ և խնդիրն այն է, որ քաղաքական ուժերն այդ ցանկությունները փաթեթավորեն ու դրան տան քաղաքական բովանդակություն. «Մարդիկ ուզում են փոփոխություն, բայց առաջին հերթին այդ փոփոխությունների պահանջը սպասարկելու մեթոդների, ձևի բովանդակության մեջ։ Երբ դա չեն տեսնում, փողոցային ակցիան հերթականն է լինելու՝ մարդիկ պատկերացնում են՝ ի՞նչ պետք է փոխվի փողոցում։ Մանավանդ երբ մնացած խոշոր ուժերը բոլորովին այլ ֆորմատով են պատկերացնում հարցերի լուծումը։ Այստեղ առանցքային է նաև «Ծառուկյան» դաշինքը, որը փոփոխություն պահանջող ձայների կրողն է։ Ամբողջ այդ հսկա միավորը, որ չի միանում «Ելք»-ին՝ արդեն իսկ կանխորոշում է որոշակի զարգացումներ կամ զարգացումների բացակայություն»։
Հարցազրույցն ամբողջությամբ՝ տեսանյութում։
