«Կովկաս» ինստիտուտի տնօրեն Ալեքսանդր Իսկանդարյանի կարծիքով՝ ղարաբաղյան հարցի կարգավորման վրա որևէ ազդեցություն չի ունենա այն հանգամանքը, թե ով է լինելու Հայաստանի վարչապետը ապրիլից հետո. «Ամենավերջին բանը, որ այդ հարցում կարևոր է՝ դա մարդիկ են։ Եթե բանակցային գործընթացը կախված լիներ նրանից, թե ինչ «տիկին կամ պարոն է նստած կոնկրետ բազկաթոռին, ապա իմաստը բոլորովին այլ կլիներ։ Ինչպես ասում են՝ հիմար մարդիկ խոսում են մարդկանց մասին, սովորական մարդիկ՝ իրադարձությունների, իսկ խելացի մարդիկ՝ իմաստի ու ետնդենցների»,- «Առաջին լրատվական»-ի հետ զրույցում ասաց «Կովկաս» ինստիտուտի տնօրեն, քաղաքագետ Ալեքսանդր Իսկանդարյանը։
Իսկանդարյանը հավելում է. «Բանակցությունները ստացվում կամ չեմ ստացվում, ոչ թե որովհետև Սերժ Սարգսյանը վատն է, իսկ Իլհամ Ալիևը լավը կամ հակառակը։ Պատկերացնել, որ նրանց փոխարեն մեկ ուրիշը կլինի և բոլոր խնդիրները կվերանան, ու հակամարտությունը կկարգավորվի կամ հակառակը՝ ճգնաժամ կլինի, խելամիտ չէ։ Այսպիսի կատակ անեմ՝ նույնիսկ եթե Սերժ Սարգսյանն ու Իլհամ Ալիևը տեղերով փոխվեն, մեծ հաշվով, ոչինչ չի փոխվի, որովհետև հարցը մարդիկ չեն, այլ ուժերի հավասարակշռությունը, երկրների կողմնորոշումը, ՀԱՊԿ-ը, մարդկային ու ֆինանսական ռեսուրսները, ինչպես է կազմավորված բանակը, ինչպես են տրամադրված հասարակությունները։ Սա ունի շատ պարզ ապացույց»։
Շարունակելով իր միտքը՝ Իսկանդարյանը նշում է, որ բանակցային գործընթացը սկսվել է առաջին նախագահ Լևոն Տեր-Պետրոսյանի օրոք և 25 տարի է շարունակվում է. «ՀՀ երեք նախագահները անձնապես իրարից շատ խիստ տարբերվում են՝ տարբեր կրթություն ունեն, տարբեր բնավորություն, տարբեր մարդիկ են, իսկ բանակցային գործըթնացն այնտեղ է, որտեղ եղել է։ Ով էլ ղեկավարի երկիրը՝ իրավիճակը կմնա այնպես, ինչպես կա՝ մինչ այն պահը, երբ խոշոր ինչ-որ բաներ կփոխվեն։ Ես որևէ փոփոխություն չեմ սպասում առաջիկայում, այդ թվում նաև ապրիլ ամսին»։
Քաղաքագետը նշում է, որ մեծ սպասելիքներ չպետք է ունենալ նաև առաջիկայում սպասվող Նալբանդյան-Մամեդյարով հանդիպումից. «Բանակցային գործընթացն արդեն շատ վաղուց չի զբաղվում հակամարտության կարգավորմամբ և որևէ առաջընթաց սպասել պետք չէ»։
Ալեքսանդր Իսկանդարյանն անդրադարձել է նաև ներքաղաքական զարգացումներին՝ առաջիկայում սպասվող «Ելք» դաշինքի հրավիրած երթին։
Հարցազրույցն ամբողջությամբ՝ տեսանյութում։