«Գազի թանկացման արդյունքում հետզհետե կպակասի երթուղային տրանսպորտի քանակն այնքան, որ վերջում քաղաքացիները ստիպված են լինելու ոտքով ման գալ և սա միանգամայն ռեալ բան եմ ասում. որպեսզի այսպես չլինի մեզ գոնե այս ժամանակահատվածում քանի դեռ քաղաքապետարանն իր փոփոխությունները չի կատարել վերջացրել, ապա գոնե փոխադրող ընկերություններին պետք է վառելիքն ինքնարժեքով տան և ազատեն հարկային բեռից», – «Առաջին լրատվական»-ի հետ զրույցում նշեց Փոխադրողների միության նախագահ Հրանտ Եղիազարյանը` անդրադառնալով երթուղային տրանսպորտի մի քանի տասնյակ վարորդների իրականացրած գործադուլին։
Հիշեցնենք, որ հունվարի 1-ից ուժի մեջ մտած հարկային նոր օրենսգրքով բարձրացել է ակցիզային հարկը, որի հետևանքով 10-15%-ով թանկացել է սեղմված գազը, բենզինի բոլոր տեսակների գինը, քսանյութերն ու դիզվառելիքը։ Արդյունքում` երթուղային տաքսիների վարորդները գործադուլ էին հայտարարել ` պահանջելով գոնե երթուղայինների համար նվազեցնել գազի գինը, հակառակ պարագայում նրանք կշարունակեն իրենց գործադուլներն ու բողոքի ակցիաներն այնքան ժամանակ` մինչև նրանց պահանջը բավարարվի։
Հրանտ Եղիազարյանի խոսքերով` սեպտեմբերից մինչև հիմա դիզվառելիքը թանկացել է 110 դրամով, ինչը աննախադեպ է. «Դիզվառելիքը դրսից ձեռք է բերվում նախկին նույն գնով, դեռ մի բան էլ ավելի էժան, դոլարի կուրսի փոփոխություն չի եղել, նավթի համաշխարհային գները չեն թանկացել, ապա ես չգիտեմ ինչու են մեզ մոտ թանկացրել. կարծում եմ սպեկուլյատիվ ձևով են թանկացրել, որովհետև եթե դրսից ձեռք բերման գինը չի թանկացել, այլ միայն ներսում իրականացվող վաճառքի գինն է ավելացել, ապա դրա հետևում միմիայն սպեկուլյացիան է կանգնած, ուրիշ ոչինչ», – շեշտեց փոխադրողների միության նախագահը։
Մանրամասները` տեսանյութում։