Վրաստանի նախագահ Գեորգի Մարգվելաշվիլին հայտարարել է, որ չի ծրագրում ներել պետության նախկին նախագահ Միխայիլ Սաակաշվիլիին, ով հեռակա կարգով դատապարտված է հայրենիքում։
«Ի՞նչ տրամաբանությամբ ես պետք է ներեմ Սաակաշվիլիին։…Վրաստանի նախագահը պետք է ների և դրանով իսկ ուղղի՞ սխալները։ Համաներումը ճակատագրական սխալի ուղղում չէ»,-ասել է Մարգվելաշվիլին «Ռուսթավի 2» հեռուստաընկերության հետ հարցազրույցում։
Նախագահի խոսքով՝ Սաակաշվիլին հիմնել է համակարգ, որն աշխատում է մինչ օրս, և նոր իշխանությունները չեն կարողացել քանդել այն, հետևաբար՝ դատախազությունն ու դատարանը գործում են՝ ըստ հին ավանդույթների։
Ավելի վաղ Թբիլիսիի դատարանը հեռակա կարգով դատապարտել էր Սաակաշվիլիին 3 տարվա ազատազրկման՝ 2006 թվականին «Վրաստանի միացյալ բանկի» աշխատակից Սանդրո Գիրգվլիանիի սպանության գործով։ Նախագահը մեղավոր է ճանաչվել «ծառայողական դիրքի չարաշահման» հոդվածով։ Սաակաշվիլին համաներել է բարձրաստիճան պաշտոնյաներին, ովքեր կապված են Գիրգվլիանիի գործի հետ՝ այդպիսով ազատելով նրանց պատասխանատվությունից։
Դրանից հետո Կիևում քաղաքական գործիչները խոսել են Սաակաշվիլիի արտահանձնման հնարավորության մասին։ Դատարանի վճռից անմիջապես հետո Մարգվելաշվիլին հանդես էր եկել դատախազությանն ուղղված քննադատությամբ՝ նշելով, որ Սաակաշվիլիի քրեական հետապնդումը տեղի է ունենում սահմանադրական հոդվածի հիման վրա և դրանով իսկ հարված հասցնում երկրի միջազգային հեղինակությանը։
