Թող քրեաօլիգարխիկ համակարգի պատգամավորները խորհրդարանական լսումներ անցկացնեն իրենց հակասահմանադրական բիզնեսների վերաբերյալ, գնաճի վերաբերյալ խորհրդարանական լսումներ անցկացնելու նախագահի հանձնարարականը ուշացած է։ Այդ մասին «Առաջին լրատվական»-ի հետ զրույցում ասաց «Տնտեսական իրավունքի կենտրոն» ՀԿ նախագահ Մովսես Արիստակեսյանը։ Նրա դիտարկմամբ՝ խորհրդարանական լսումներ պիտի լինեին Հարկային օրենսգրքում փոփոխություններ անելուց առաջ, և առահասարակ, նախագահը պետք է օրենքի նախագիծը չստորագրեր։ Մովսես Արիստակեսյանն անթույլատրելի է համարում նաև հանրապետականների արձագանքը գնաճին, մասնավորապես՝ ԱԺ ՀՀԿ խմբակցության ղեկավար Վահրամ Բաղդասարյանը, լրագրողների հետ զրույցում հայտարարել էր, որ անցած տարի այս նույն ժամանակահատվածում ունեցել ենք 5 տոկոս գնաճ, այս տարի ընդամենը ունենք 2-2․5 տոկոս գնաճ։
«Թող ուսումնասիրեն, թանկացումներ շատ ենք ունեցել՝ ե՞րբ են երթ արել, կարո՞ղ է իրանցիներից վարակվեցին: Իրանցիների մոտ հետաքրքիր բան եղավ՝ 15, 20 հոգի զոհվեցին, հետո պարզվեց, որ բենզինը չի թանկացել»,- շեշտել էր նա։
Մովսես Արիստակեսյանն ընդգծեց, որ հանրապետականներն իրենց հայտարարությունների մեջ պետք է զգույշ լինեն, սոցիալական բունտի բոլոր նախադրյալները կան։
«Ես առաջին հարցս կուղղեի պարոն Բաղդասարյանին՝ որպես խորհրդարանական խմբակցության ղեկավար, այդ որտեղից վերցրեց 2․5 տոկոս գնաճը, ինքը սկսեց հաշվարկներ անելը, ԱՎԾ-ն դեռևս չի հրապարակել պաշտոնական տվյալներ թանկացումների մասին։ Իսկ ինչ վերաբերում է 5 տոկոսին՝ անցյալ տարվանը խիստ մեղմացված է․ առնվազն վերջին եռամսյակում, մեր գնահատականներով, կազմում էր 15 տոկոս։ Ես կոչ կանեի ոչ թե տարբեր հեղափոխական վարակների մասին խոսել, այլ պարզապես ինքը ունենար պետականամետ մտածողություն, ոչ թե իր բիզնես շահերը պաշտպանելու, ունենար ժողովրդի շահերը իրապես պաշտպանելու մտորումներ։ Թող փորձի տեսնի՝ իր շրջապատում բացի նրանցից, ովքեր քրեաօլիգարխիկ համակարգի մաս են կազմում, մնացածը ինչպես են ապրում»։
Մանրամասները՝ տեսանյութում։
