Պաշտպանության նախկին փոխնախարար, գեներալ-լեյտենանտ Գագիկ Մելքոնյանը կարծում է, որ առաջնագծում զոհերը բացառելու ճանապարհ կա՝ դա հեռահար մարտ վարելն է, պայմանագրային բանակ ու հզոր պահեստազորային թիկունք ունենալն է։ Ըստ նրա՝ մենք պատերազմին ամեն վայրկյան պիտի պատրաստ լինենք, և փոփոխությունները պետք է միտված լինեն առաջնագիծը հզորացնելուն՝ թե՛ տեխնիկապես և թե՛ կադրային առումով։ Անդրադառնալով 2017 թ-ին կատարված փոփոխություններին՝ «Ես եմ», «Պատիվ ունեմ» ծրագրերին և հայտարարությանը, որ «Ես եմ» ծրագիրն արդեն իսկ 100-ից ավելի շահառու ունի, գեներալն ասաց․
«10 հազարի մեջ, ասենք, 100 հոգի շահառու եղավ, հետո, ինչը փոխեց էդ 100 հոգին, ոչինչ չփոխեց, ասում են 5 մլն փող կստանա վերջում, էդ 5 միլիոնը թող հիմի տան մարդկանց։ Մարդիկ, երբ որ բանակից զորացրվում են, թողնում, երկրից գնում են, այսինքն՝ ռեզերվը մենք ընդմիշտ կորցնում ենք, դրա մասին պիտի մտածենք։ Էդ ռեզերվը պահելու մասին պիտի մտածենք, պահելու լավագույն տարբերակներից մեկն այն է, որ եթե պայմանագրայինի աշխատավարձը 250 հազար դրամ լիներ, ուրեմն էդ ռեզերվի 70 տոկոսը դուրս չի գնա, կարա ընտանիքը պահի՝ նաև մնացած արտոնություններից օգտվելով։ Սրա մասին պիտի մտածենք, ոչ թե 100 հոգու, որ եկան գրվեցին, ծառայածների մասին պիտի մտածենք, որ մնան երկրում, ռեզերվ ունենանք, կռիվը մի օր չէ, միայն առաջնագիծը չէ, թիկունք պիտի ունենաս, եթե թիկունքն ուժեղ է, առաջին գիծը շատ ուժեղ է, եթե չկա թիկունք՝ առաջին գիծը շատ թույլ է»,- շեշտեց նա։
Գագիկ Մելքոնյանի խոսքերով՝ թիկունքը ուժեղ է նաև, երբ պաշտպանության ոլորտում ավանդ ունեցող նախկին պաշտոնյաներին հարգանքով են վերաբերվում, չեն ազատազրկում, իսկ այսօր տեսնում ենք՝ ինչ է կատարվում և՛ Սեյրան Օհանյանի, և՛ Սամվել Բաբայանի, և շատ ու շատ այլ նախկին պաշտոնյաների հետ։
«Էլ չես ծառայում, դուրս եկար, պրծար դու, նախկին պատվաբեր հասկացությունը չկա, պաշտոնից հենց հանեցին, վաղը բարև տվող չկա, ժողովուրդը դրան է սովորել, քծնանքը դարձել է առաջնային։ Էն ժամանակ Սեյրան Օհանյանի առաջ բոլորը վազում էին, քիչ էր մնում կոստյումի փեշերը պաչեին, բայց երբ մարդը տեսավ՝ ուղին տանում է փակուղի, ասաց՝ պիտի փոփոխություններ լինեն, երկիրը կործանվում է, էլ բարև էլ չեն տալիս»,- նշեց նա։
Մանրամասները՝ տեսանյութում։