Այս օրերին ֆուտբոլասերների ուշադրությունը սևեռված է տրանսֆերային շուկայում տեղի ունեցող զարգացումների վրա: Մինչ այս տեղի ունեցած ամենանշանակալի տրանսֆերը, «Լիվերպուլի» բրազիլացի կիսապաշտպան Կոուիտինյոյի տեղափոխությունն էր «Բարսելոնա»: Վերջինս «Լիվերպուլին» վճարել է 160 միլիոն եվրո: Խոսվում է մեկ այլ բրազիլացի, ՊՍԺ-ի հարձակվող Նեյմարի՝ Մադրիդի «Ռեալ» հնարավոր տեղափոխության մասին, որը տրանսֆերային շուկայում կարող է նոր ռեկորդ սահմանել:
Մեզ համար ձմեռային տրանսֆերային պատուհանը կարող է նշանավորվել «Մանչեսթեր Յունայթեդի» կիսապաշտպան Հենրիխ Մխիթարյանի այլ թիմ տեղափոխվելով, չնայած որ այս պահին որևէ հստակություն չկա: «Մեր նպատակն է, որ հնարավորինս շատ հայ ֆուտբոլիստներ հանդես գան միջազգային բարձրակարգ թիմերում»,- օրեր առաջ լրագրողների հետ հանդիպմանն ասաց Հայաստանի ֆուտբոլի ֆեդերացիայի նախագահ Ռուբեն Հայրապետյանը:
Այսօր Հայաստանի բարձրագույն խմբի առաջնությունում կան մի քանի ֆուտբոլիստներ, որոնք կարող են ելույթ ունենալ ավելի բարձրակարգ թիմերում: Խոսքն առաջին հերթին վերաբերվում է «Փյունիկի» ներկայացուցիչներ Արթուր Քարտաշյանին, Էրիկ Վարդանյանին և Պետրոս Ավետիսյանին: Տարեվերջին մամուլում հրապարկումներ եղան, որ Ավետիսյանի ծառայություններով հետաքրքրված է Լուգանսկի «Զարյան», որը Ուկրաինայի ուժեղագույն թիմերից է և նախորդ տարի ելույթ է ունեցել Եվրոպա լիգայի խաղարկության խմբային փուլում: Ինչ խոսք «Զարյա» տեղափոխվելը Ավետիսյանի համար լուրջ առաջընթաց կլինի: Նշենք, որ այս ֆուտբոլիստը Հայաստանի երիտասարդական հավաքականի ավագն է և կան բոլոր նախադրյալներ, որ մոտ ապագայում Ավետիսյանին տեսնենք նաև Հայաստանի ազգային հավաքականում: Ըստ տրանսֆերային շուկան ուսումնասիրող և լուսաբանող Տրանսֆերմարկետ պարբերականի՝ Պետրոս Ավետիսյանի տրանսֆերային արժեքը 175 հազար եվրո է: Ընդամենը 100 հազար եվրո է Էրիկ Վարդանյանի տրանսֆերի արժեքը: Նշենք, որ որ Վարդանյանն արդեն ելույթ է ունեցել Հայաստանի ազգային հավաքականում և դարձել տպավորիչ գոլի հեղինակ: Մինչև Բելառուսի դարպասը խփած գնդակը՝ Վարդանյանի տրանսֆերը գնահատված էր 50 հազար եվրոյով: Արթուր Քարտաշյանի տրանսֆերն էլ կազմում է 200 հազար եվրոյով:
Հուսանք, որ մոտ ապագայում այս ֆուտբոլիստներին կտեսնենք ավելի բարձրակարգ թիմերում՝ քանզի խաղալով Բարձրագույն խմբում նրանց համար շատ դժվար կլինի բարելավել որակները: Նշենք, որ Հայաստանում հանդես եկող ֆուտբոլիստների տրանսֆերային միջին արժեքը 100 հազար եվրոյից ցածր է: Հայաստանի առաջնությունում ելույթ ունեցող ամենաթանկ հայ ֆուտբոլիստը «Ալաշկերտի» և Հայաստանի ազգային հավաքականի կիսապաշտպան Արտակ Եդիգարյանն է: Վերջինի տրանսֆերը գնահատված է 300 հազար եվրոյով: Նույքան տրանսֆերային արժեք ունի նաև «Գանձասար-Կապանի» ներկայացուցիչ զամբիացի Լուբամբո Մուսոնդան: 250 հազար եվրոյով է գնահատված «Ալաշկերտի» ներկայաուցիչներ դարպասապահ Արսեն Բեգլարյանի, կիսապաշտպաններ Արտակ Գրիգորյանի, Արտյոմ Սիմոնյանի, հարձակվող Միհրան Մանասյանի, ինչպես նաև «Բանանցի» կիսապաշտպան Ռումյան Հովսեփյանի տրանսֆերային արժեքը: Թվարկված ֆուտբոլիստների խաղամակարդակը ևս թույլ է տալիս ելույթ ունենալո ավելի բարձրակարգ թիմերում: Խոսքը վերաբերվում է հատկապես Գրիգորյանին, Եդիգարյանին, Սիմոնյանին և Հովսեփյանին, որոնք Հայաստանի ազգային հավաքականի անդամներ են: Սպասվում է, որ տրանսֆերային պատուհանի ընթացքում նոր թիմ կգտնի Հայաստանի ազգային հավաքականի կիսապաշտպան Կամո Հովհաննիսյանը: Վերջինս հեռանալով Բելառուսի «Տորպեդո ԲԵԼԱԶ»-ից՝ մնացել է առանց թիմ: Հովհաննիսյանի տրանսֆերը գնահատված է 400 հազար եվրո:
Ինչևէ, որպեսզի ավելի պատկերավոր լինի հայ ֆուտբոլիստների ու հայկական թիմերի արժեքը համաշխարհային տրանսֆերային շուկայում, նշենք, որ բարձրագույն խմբի 6 ակումբներից ամենաարժեքավորը «Ալաշկերտն» է: Վերջինի ֆուտբոլիստների ընդհանուր արժեքը կազմում է 3․68 միլիոն եվրո: «Բանանցի» խաղացողների ընդհանուր արժեքը կազմում է 3․4 միլիոն եվրո: Երրորդ հորիզոնականում «Փյունիկն» է 3․35 միլիոն եվրոյով: Նշենք սակայն, որ «Ալաշկերտն» ունի 5, «Բանանցը»՝ 7, իսկ «Փյունիկը» ընդամենը 1 լեգիոներ: Հետևաբար կարելի է ասել, որ «Փյունիկը» ամենահայկական՝ ամենաթանկ ակումբն է: «Գանձասար-Կապանի» ֆուտբոլիստների արժեքը կազմում է 2․83, իսկ «Շիրակի» ֆուտբոլիստների արժեքը՝ 2․4 միլիոն եվրո: Երևանի «Արարատը» որտեղ լեգիոներներ ընդհանրապես չկան, գնահատված է 1․35 միլիոն եվրոյով: Հայաստանի բարձրագույն խմբի ընդհանուր արժեքը կազմում է 17 միլիոն եվրո: Ֆուտբոլի Հայաստանի ազգային հավաքականի ընդհանուր արժեքը կազմում է 42․98 միլիոն եվրո, որից 35 միլիոն եվրոն Հենրիխ Մխիթարյանի տրանսֆերային արժեքն է:
Փաստորեն, Հայաստանի բարձրագույն խմբի առաջնությունը նույնիսկ Մխիթարյանի տրանսֆերային արժեքի կեսը չի կազմում: Պատկերն իսկապես ցնցող է: