«Սա առաջինն է, սակայն վերջինը չէ․ պարբերաբար քայլերի որոշակի հաջորդականությամբ փորձելու ենք անել այնպես, որպեսզի ըստ էության չեղարկվեն այս թանկացումները»,- «Առաջին լրատվական»-ի հետ զրույցում ընդգծեց «Ելք» դաշինքի ներկայացուցիչ, «Լուսավոր Հայաստան» կուսակցության խորհրդի անդամ Հայկ Կոնջորյանը՝ անդրադառնալով իրենց կազմակերպած երթին։
Հիշեցնենք, որ «Ելք» դաշինքը հունվարի 19-ին ժամը 17-ին նախաձեռնել է բողոքի երթ իրականացնել ընդդեմ թանկացումների։
Հայկ Կոնջորյանի խոսքերով՝ այստեղ շատ կարևոր է քաղաքացիական հասարակության, ընդդիմադիր քաղաքական ուժերի, ՀՀ քաղաքացիների պարտադրանքի աստիճանը, որը կարող է ստիպել կառավարությանը որոշակի փոփոխություններ անել։
«Ինչպես ֆուտբոլում է ասվում՝ յուրաքանչյուր թիմ խաղում է այնքան, որքան նրան թույլ է տալիս հակառակորդ թիմը․ հիմա նույնը այս դեպքում է՝ Հայաստանի կառավարությունը, իշխանությունները խաղում են այնքան, ինչքան նրանց թույլ է տալիս ՀՀ քաղաքացին, հասարակությունը, ընդդիմադիր ուժերը․ եթե մենք կարողանանք հասնել ճնշման այնպիսի մակարդակի, որպեսզի կառավարությունը վերաիմաստավորի իր քայլերը և որոշումները, ապա դա շատ լավ կլինի և այս պարագայում մենք հնարավորինս փորձելու ենք անել այնպես, որպեսզի ճնշման այդ մակարդակին կարողանանք հասնել»,-ասաց Կոնջորյանը։
Վերջինս ծիծաղելի որակեց նաև այս օրերին տարբեր մարդկանց կողմից հնչեցվող այն գնահատականները, թե «Ելք»-ի այս երթը պոպուլիստական քայլ է։ Ըստ մեր զրուցակցի՝ եթե առաջնորդվեն նման կարծիքներով, ապա երբեք ոչինչ չպետք է անեն։
Հարցին՝ ի՞նչ ակնկալիքներ կան քաղաքական մյուս ուժերից, արտախորհրդարանական ուժերից և հասարակությունից՝ իրենց նախաձեռնած այս երթին սատարելու, միանալու առումով, «Ելք»-ի անդամը պատասխանեց․ «Մենք հայտարարել ենք, որ բաց ենք և ըստ էության բոլորին հրավեր է արվում․ որևէ քաղաքական ուժի պաշտոնական հրավեր չի եղել, բայց հանրային ձևով դրված հայտարարությունը ըստ էության հրավեր է բոլոր նրանց ովքեր մտահոգ են այս խնդրով և այս պարագայում կիսում են պայքարի այս մեթոդաբանությունը»։
Մանրամասները՝ տեսանյութում։