Չի կարելի վստահ լինել, որ մարդիկ այս անգամ ևս ոտքի չեն կանգնի, իշխանությունները չեն կարող անընդհատ սեղմել ժողովրդին և պատասխան չստանալ։ Այս մասին «Առաջին լրատվական»-ի հետ զրույցում ասաց 2015թ. էլեկտրաէներգիայի սակագնի համար պայքարող «Ո՛չ թալանին» շարժման անդամ Արտուշ Չիբուխչյանը՝ հավելելով, որ զսպանակը բացվելու է, որը շատ ցավոտ կլինի սեղմողների համար։ Արտուշ Չիբուխչյանն ընդգծեց, որ վաղ է ասել, թե գնաճային այսպիսի ճնշումների պարագայում քաղաքացիական ճակատ չի ձևավորվի։
«Սոցիալական դժգոհությունների արդյունքում ձևավորված շարժումները շատ ավելի վտանգավոր կարող են լինել իշխանությունների համար։ Այն կարող է ձևավորվել ցանկացած պահի, քանի որ մեր երկրում քաղհասարակությունը բավականին երկար ճանապարհ է անցել և ցույց է տվել, որ երբ սպառվում են բոլոր քաղաքական ուժերը, ինքը կարող է շատ արագ ու տեղին ինքնակազմակերպվել»,- նշեց նա։
Արտուշ Չիբուխչյանի խոսքով ՝ սոցցանցային դժգոհությունից իրականությանն անցումը դժվարին, բայց անհնար գործընթաց չէ։
«Պետք չէ թերագնահատել վիրտուալ տիրույթում մարդկանց արտահայտած դժգոհությունները, որովհետև պրոցեսը կարող է լավ եփվել այնտեղ, այնուհետև տեղափոխվել փողոց»,- ընդգծեց նա։
Արտուշ Չիբուխչյանը արձագանքելով ընդդեմ թանկացումների «Ելք»-ի հրավիրած երթին՝ իր ֆեյսբուքյան էջում գրառում էր կատարել, որով անվստահություն էր ներկայացնում: «Մենք կոչ ենք անում բոլոր նրանց, ովքեր ուզում են վերջ տալ այս անօրինական թանկացումներին, դուրս գալ փողոց։ Մենք, լինելով ընդդիմադիր ուժ, պատրաստ ենք փողոցում կանգնել ժողովրդի կողքին ու միասին պայքարել այս թալանի դեմ։
Վերելք դաշինք»,- գրել էր նա։
Անդրադառնալով հարցին, թե թերահավատությունը ինչով է պայմանավորված, Արտուշ Չիբուխչյանն ասաց. ««Ելք»-ի հանդեպ վստահության որոշակի կորուստը պայմանավորված է հենց այդ քաղաքական ուժի գործունեությամբ։ Այս անգամ արդեն «Ելք»-ը իր ընտրողներին ապացուցելու բան ունի՝ որ ձայներ ստացել է ոչ միայն ԱԺ-ում խոսելու համար, այլև պատրաստ է ավելի ռեալ և ռադիկալ քայլերի, պատրաստ է փողոցային պայքարի։ Բացի այդ, քաղաքական ուժը պետք է հստակ ցույց տա իր քայլերի հաջորդականությունը. երբ ժողովուրդը վստահ լինի, որ իրեն չեն խաբի, ճանապարհի կեսից մենակ չեն թողնի կամ տուն չեն ուղարկի, կկանգնի այդ ուժի կողքին»,- եզրափակեց նա։
