Ես հավատ չեմ տածում տնտեսական աճի վերաբերյալ կանխատեսումների նկատմամբ՝ լինի Համաշխարհային բանկի, թե Հայաստանի Կենտրոնական բանկի կամ կառավարության կողմից։ Այդ մասին «Առաջին լրատվական»-ի հետ զրույցում նշեց «Ծառուկյան» խմբակցության պատգամավոր, տնտեսագետ Վարդան Բոստանջյանը։
Նրա խոսքերով՝ դրանք բոլորն ունեն իրենց գերատեսչական շահերը, պետական շահերը և սուբյեկտիվ այլ շահեր. «Տեսեք, տնտեսական աճը ֆիքսվում է 3-4 տոկոսի սահմաններում։ Ե՛վ մեկը, և՛ մյուսը կարող են հավատ չներշնչել, պայմանավորված նրանով, որ դրանց հիմքում դրվում են տարբեր մեթոդաբանություններ և կարող է պատահել, որ մակարդակային առումով կանխատեսումները այլ թվեր ցույց տան, քան մենք կուզենանք»։
Վարդան Բոստանջյանը նշեց, որ Հայաստանի նման երկիրը պետք է ակնհայտորեն մեծ, բարձր տնտեսական աճ ունենա։ «Ես հասկանում եմ, որ մենք ի զորու ենք ընդհուպ մինչև երկնիշ տնտեսական աճ ունենալ։ Հայաստանը Չինաստան չէ իր ծավալային, իր տնտեսական համակարգի մեծությամբ, և ըստ էության, մենք ռացիոնալ չենք աշխատում»,- ընդգծեց Բոստանջյանը։
Հարցազրույցն ամբողջությամբ՝ տեսանյութում։
