Ես Նարեկ Սամսոնյանին չեմ սպառնացել, մամուլը սխալ է գրել, ընդամենը հորդորել եմ Ժիրայր Սեֆիլյանին մեր առաջնորդ՝ Աբդուլահ Օջալանի հետ չհամեմատել։ Այդ մասին «Առաջին լրատվական»-ի հետ զրույցում ասաց Աբուզեթ Քալաշյանը, որը ներկայանում է որպես Քրդական աշխատավորական կուսակցության (PKK) անդամ։ Նա ընդգծեց, որ իրենք խստորեն մտահոգված են Օջալանի անունն ահաբեկչության հետ կապելու առնչությամբ։ Հիշեցնենք, որ «Առաջին լրատվական»-ի հետ զրույցում «Քաղաքացիական գիտակցություն» ՀԿ նախագահ Նարեկ Սամսոնյանը ընդգծել էր, որ Ժիրայր Սեֆիլյանը իրեն Օջալանի տեղն է դրել։ Նա նաև «Սասնա ծռեր»-ին ահաբեկիչ էր անվանել և ընդգծել էր, որ ահաբեկիչներին սատարում է 10-20 հոգանոց խումբ։ Հարցազրույցից հետո մամուլում տեղեկատվություն էր հայտնվել, որ այդ խոսքերի համար Սամսոնյանին Քրդական PKK-ն սպառնում է պատժել, նշվում էր, որ Սամսոնյանի հետ կապ է հաստատել հենց Աբուզեթ Քալաշյանը։
«Մենք աշխատում ենք էդ կուսակցությունում, մենք պատրաստ են հանուն այդ կուսակցության, նրա առաջնորդի զոհվել, մենք արյամբ ենք աշխատում։ Օջալանն այսօր պայքարել է մեր ազգի ազատության համար։ Հայաստանում հազարավոր Օջալանի հետևորդներ կան, մենք ունենք նաև քուրդ պատգամավոր Կնյազ Հասանովը, որը ներկայացնում է մեր շահերը ՀՀ-ում, բնականաբար, նա էլ է Օջալանի հետևորդը։ Ուզում եմ մի անգամ էլ նշել՝ Սամսոնյանի հետ լարված հարաբերություններ չկան, նա պարզաբանեց, որ ոչ թե Օջալանի հետ համեմատել է, այլ ասել է, որ Սեֆիլյանն իրեն Օջալանի տեղն է դրել։ Ես էլ ասել եմ, որ Օջալանը ոչ թե իր ազգի դեմ է կռվում, պայքարում, կամ ուզում հեղափոխություն անել, այլ թշնամու դեմ է պայքարում, պայքարում է իր հողի համար, աշխարհում ամենաթանկ բանի՝ ազատության։ Օջալանը իր կյանքը զոհաբերել է մեր կյանքի, ազատության համար»,- շեշտեց նա։
Աբուզեթ Քալաշյանը ընդգծեց, որ ինքը խոսում է քրդական ամբողջ համայքի անունից և բոլորի համար շատ-շատ վիրավորական է, որ «ինչ-որ մեկի՝ Սեֆիլյանի հետ կարող էին համեմատել Օջալանին»։
Աբուզեթ Քալաշյանը ընդգծեց, որ տեղի քրդական համայնքը պահում է կապը աշխարհի բոլոր քրդերի հետ, այդ թվում՝ Թուրքիայի քրդական համայնքի։
