«Աջ ղեկ» նախաձեռնությունը դեռևս կառավարությանը չի ներկայացրել իր պահանջների գրավոր տարբերակը։ Այս օրերին նրանք աշխատում են իրենց պահանջները հիմնավորող գրության վրա, որը առաջիկայում կներկայացվի կառավարությանը։ Այս մասին «Առաջին լրատվական»-ի հետ զրույցում ասաց «Աջ ղեկ» նախաձեռնության համակարգող խմբի անդամ Արթուր Խաչատուրյանը։
«Մեր պահանջները մենք կներկայացնենք վաղը։ Վերահաշվառման արգելքից հետո մենք որոշում կայացրեցինք գնալ բանակցային փուլ, քանի որ մեր սկզբնական պահանջը եղել էր հենց վերահաշվառման արգելքի բացառումը, որից հետո նոր միայն մենք կգնայինք կառավարության հետ բանակցությունների։ Մենք կարծում ենք, որ ամեն հարց չէ, որ ուժ ցույց տալու ճանապարհով է լուծվում։ Դրա համար մենք որոշում կայացրեցինք գնալ կառուցողական քայլերի»,- ասաց Արթուրը՝ հավելելով, որ իրենց հաջորդ գլխավոր պահանջն այն է, որ աջ ղեկով մեքենաների ներմուծման արգելքն էլ հանվի։
«Մենք հիմա հիմնավորումներով փաստաթուղթ ենք մշակում։ Մենք կարդացել ենք նաև ԵԱՏՄ օրենքները, որտեղ հստակ ամրագրված է, որ մինչև 8 տեղանոց մարդատար մեքենաների ներմուծումն ու շահագործումը ԵԱՏՄ երկրներում թույլատրելի է։ Արգելվում է միայն դրանից մեծ մեքենաների ներկրումն ու աջ ղեկով մեքենաների արտադրությունը»,- նշեց մեր զրուցակիցը՝ հավելելով, որ ներկայումս Հայաստանը այնպիսի երկիր չէ, որը կարող է իրեն թույլ տալ հրաժարվել տարեկան 20 միլիոն դոլար հարկերից, որը գոյանում է հենց մեքենաների ներմուծումից ու վճարվող հարկերից։
Արթուր Խաչատուրյանն անդրադարձավ նաև նախօրեին կառավարության դիմաց բողոքի ակցիայի ժամանակ տեղի ունեցած տարաձայնությանը, երբ «Աջ ղեկ» նախաձեռնության անդամները կառավարության դիմաց ակցիան համարեցին ավարտված և այլևս վարչապետի հետ հանդիպում չպահանջեցին՝ համարելով, որ վերահաշվառման արգելքի հանումն արդեն հաղթանակ է, իսկ վարորդների մի ստվար զանգված մնաց և շարունակում էր հանդիպում պահանջել վարչապետի հետ։ Արթուրը նշեց, որ դա չի նշանակում, թե իրենց մեջ պառակտում է եղել։
Նրա խոսքով՝ եթե կառավարությունը չգնա իրենց պահանջների բավարարմանը և կոշտ պատասխան տա, իրենք էլ կգնան կոշտ քայլերի։
Առավել մանրամասն՝ տեսանյութում: