«Մտածում են` ով մնաց որբ, ում գլուխը խուզեն». կառավարությունը հարկային դաշտում ավելացնում է ստվերը

2018թ.-ի հունվարի 1-ից ուժի մեջ մտած Հարկային նոր օրենսգրքով՝ գրանցված աշխատողների համար 150 հազար դրամից ավելի աշխատավարձ ստանալու դեպքում եկամտային հարկի դրույքաչափի բարձրացում է նախատեսվում: Հարկային նոր օրենսգրքով՝ մինչև 150 հազար դրամ գրանցված աշխատավարձի համար եկամտային հարկը կազմում է 23%, 150 հազարից մինչև 2 միլիոն դրամ աշխատավարձի դեպքում եկամտային հարկը 28% է սահմանված, իսկ 2 միլիոն դրամից ավելի աշխատավարձի դեպքում՝ 36%:

Ինֆորմացիոն տեխնոլոգիաների ձեռնարկությունների միության (ԻՏՁՄ) նախագահ Կարեն Վարդանյանի համոզմամբ՝ եկամտահարկի բարձրացման պատճառը կապված է ֆինանսական ոլորտում պետության սուվերենության բացակայության հետ։

«Քանի որ պետությունը իր ջանքերը չի ուղղում տնտեսության զարգացմանը, սոցիալական և այլ հարցերը լուծում է վարկերի միջոցով. միջազգային կառույցներից վարկեր է վերցնում, և այդ վարկերի թվացյալ ցածր տոկոսների դիմաց վարկատուն բարձրացնում է բազմաթիվ ռեսուրսներ տանելու խնդիրներ՝ հանքեր և այլն, ինչպես նաև միջամտում է քո երկրի ներքին քաղաքականությանը»,- «Առաջին լրատվական»-ի հետ զրույցում շեշտեց Կարեն Վարդանյանը։

Վերջինիս գնահատմամբ՝ կառավարությունը փոխանակ օլիգարխների գործունեությունը հանի ստվերային դաշտից և նրանց ստիպի գալ «սպիտակ դաշտ», հակառակը՝ ստիպում է «սպիտակ դաշտում աշխատող մարդկանց գնալ սև դաշտ, այսինքն՝ ավելացնել ստվերը»։

«Օլիգարխներին չեն կարողանում ստիպել, որ գան սպիտակ դաշտ և հարկ մուծեն, որովհետև կառավարությունը-իշխանությունը-օլիգարխները սերտաճած կառույց է, և նրանց չեն կարողանում ոչ մի բան ստիպել, ու հիմա մտածում են, թե ով է մնում որբ, ում գլուխը կարան խուզեն, և դա սպիտակ դաշտում աշխատող մարդիկ են: Իսկ սպիտակ դաշտում աշխատողները տեխնոլոգիական ոլորտի մասնագետներն են, ովքեր ուղղակիորեն աշխատում են դրսի հետ և ստանում են միջազգայնորեն նորմալ աշխատավարձ: Ստացվում է, որ կառավարությունն անցել է այս մարդկանց ճնշելու, իսկ 2 միլիոնից ավելի աշխատավարձ ստացողները ցանկացած տեխնոլոգիական ձեռնարկության հիմնաքարերն են, որոնց վրա հիմնված է տեխնոլոգիական ոլորտը: Նրանց եկամտահարկը այսչափ բարձրացնելը հանգեցնելու է տարաբնույթ խնդիրների՝ սկսած ձեռնարկության մրցունակության անկումից»,- հավելեց Վարդանյանը։

Մանրամասները՝ տեսանյութում։