«Ճվճվ Արոյի»՝ նույն ինքը Արայիկ Վարդանյանի որդուն՝ Սերժ Վարդանյանին կալանավորելու վերաբերյալ քննիչի միջնորդությունը դատարանը բավարարել է: Այդ մասին «Փաստինֆո»-ի հարցման ի պատասխան հայտնել է Քննչական կոմիտեի նախագահի խորհրդական Սոնա Տռուզյանը:
Նշենք նաև, որ հետախուզման մեջ գտնվող Սերժ Վարդանյանը հայտնաբերվել է, ուստի՝ նա անմիջապես կկալանավորվի:
Հիշեցնենք, որ վարույթն իրականացնող մարմինն ավելի վաղ որոշում էր կայացրել Սերժ Վարդանյանին ՀՀ քրեական օրենսգրքի 176-րդ հոդվածի 1-ին մասով և 258-րդ հոդվածի 3-րդ մասի 1-ին կետով որպես մեղադրյալ ներգրավելու մասին և նրա նկատմամբ հետախուզում էր հայտարարել:
Ավելի վաղ «Փաստինֆո»-ն գրել էր, որ դեռևս նախորդ տարի սեպտեմբերին «Ճվճվ Արոյի» որդու՝ Սերժ Վարդանյանի մասնակցությամբ կողոպուտի դեպք էր գրանցվել. 2017թ. սեպտեմբերի 12-ին Հրաչյա Քոչար փողոցում Սերժ Վարդանյանը «Օպել Աստրա» մակնիշի ավտոմեքենայի սրահում պոկել և բացահայտ հափշտակել էր Կարեն Գասպարյանի պարանոցի ոսկյա շղթան:
Դեպքից հետո հայտնի դարձավ, որ Սերժ Վարդանյանին մեղադրանք է առաջադրվել ՀՀ քրեական օրենսգրքի 176-րդ հոդվածի 1-ին մասի հատկանիշներով և որպես խափանման միջոց է ընտրվել ստորագրություն չհեռանալու մասին:
Այս դեպքից ամիսներ հետո մայրաքաղաքում ևս մեկ միջադեպ էր գրանցվել մի խումբ երիտասարդների մասնակցությամբ:
2017 թվականի նոյեմբերի 26-ին «Աֆրիկյաններ» ռեստորանային համալիրում մի խումբ երիտասարդներ աղմկել ու անհարգալից վերաբերմունք էին դրսևորել ռեստորանում գտնվող հաճախորդների նկատմամբ, ապա նաև բռնություն էին կիրառել և հայհոյանքներ հնչեցրել մատուցողի հասցեին:
Տեղի ունեցած փաստով դեկտեմբերի 01-ին հարուցվել էր քրեական գործ՝ ՀՀ քրեական օրենսգրքի 258-րդ հոդվածի 3-րդ մասի 1-ին կետի հատկանիշներով:
Քննչական կոմիտեից մեր հարցմանն ի պատասխան տեղեկացրել էին, որ ձեռնարկված միջոցառումների արդյունքում պարզվել է, որ այդ միջադեպին մասնակցություն է ունեցել նաև «Ճվճվ Արոյի» որդի Սերժ Վարդանյանը, ուստիև՝ Երևանի քննչական վարչությունում 2017 թվականի դեկտեմբերի 23-ին որոշում է կայացվել երկու քրեական գործերը միացնելու մասին:
Այդ ընթացքում Սերժ Վարդանյանին նախկինում առաջադրված մեղադրանքի ծավալը լրացնելու և փոփոխելու նպատակով վարույթն իրականացնող մարմինը ծանուցագրեր է ուղարկել նրան՝ ներկայանալու համար, սակայն Վարդանյանը չի ներկայացել։ Նման պայմաններում նրան բերման ենթարկելու որոշում էր կայացվել:
