Թեհրանը դիտարկում է միջուկային գործարքից ԱՄՆ-ի հնարավոր դուրս գալուն ուղղված պատասխան գործողությունների բոլոր տարբերակները։ Այս մասին հայտնում է IRNA գործակալությունը՝ հղում անելով երկրի ԱԳՆ մամլո քարտուղար Բահրամ Ղասեմիին։
«Եթե ԱՄՆ վաչակազմը մեծ սխալ թույլ տա՝ կապված միջուկային համաձայնագրի հետ, Իրանի արձագանքը կհանգեցնի նրանց զղջման»,-ասել է Ղասեմին։
«Հունվարի 13-ին ԱՄՆ նախագահ Դոնալդ Թրամփը որոշում կընդունի հակաիրանական պատժամիջոցների վերականգնման վերաբերյալ, և մենք դեռ չենք արտահայտի նախասահմանված կարծիքն այդ մասին և կսպասենք»,-ասել է Ղասեմին ճեպազրույցի ժամանակ։
Նա նաև հայտարարել է, որ Թեհրանը վաղուց պատրաստ է բոլոր հնարավոր սցենարներին, և բոլոր տարբերակները գտնվում են սեղանի վրա։ «ԱՄՆ-ի քայլին համապատասխան՝ Իրանի պատասխան գործողությունները նույն օրը և նույն ժամին արագորեն կիրագործվեն»,-հավելել է նա։
«Գործողությունների համատեղ համապարփակ պլանը միջազգային գործարք է։ ԱՄՆ վարչակազմը պարտավոր է այն իրագործել՝ համապատասխան համաձայնագրի»,-նշել է Ղասեմին՝ հայտարարելով, որ գործարքից Վաշինգտոնի դուրս գալը կամ պլանի հետ կապված ցանկացած այլ ոչ տրամաբանական գործողություն ԱՄՆ-ի համար կբերի համապատասխան հետևանքներ։ «Այդ որոշումների արդյունքները կարևոր նշանակություն ունեն ինչպես մեր, այնպես էլ ամերիկացիների համար»,-ասել է Ղասեմին։