Իրանի հակակառավարական ցույցերի ձերբակալված մասնակիցներից մեկը բանտում վերջ է դրել կյանքին։ Այս մասին հայտնում է BBC-ն՝ հղում անելով իրանցի խորհրդարանականներին։
Ցուցարարի անունը չի հաղորդվում, սակայն հայտնի է, որ նա 22 տարեկան է։ Թեհրանի բանտերից մեկում ցուցարարի ինքնասպանության փաստը հաստատել են ուժային կառույցների ներկայացուցիչները։
Վերջին 8 տարվա ամենալայնածավալ ցույցերն Իրանում սկսվել էին դեկտեմբերի 28-ին։ Ցուցարարներն իշխանությունից պահանջում են պայքարել աղքատության դեմ, ազատ արձակել քաղբանտարկյալներին, վերջ դնել ոստիկանության կամայականությանը և դադարեցնել մասնակցությունը Եմենի, Սիրիայի և Իրաքի հակամարտություններին։
Դեկտեմբերի 31-ին Իրանի նախագահ Հասան Ռուհանին հայտարարել էր, որ երկրի քաղաքացիները կարող են ազատորեն արտահայտել իրենց դժգոհությունը, սակայն կոչ էր արել խուսափել բռնությունից։
Anadolu գործակալության տվյալներով՝ ցույցերի ժամանակ զոհվել է 23 մարդ։ Ուժայինները ձերբակալել են առնվազն 500 ակտիվիստի։