Վերջին հիսուն տարվա ընթացքում օվկիանոսի՝ թթվածնից ամբողջովին զուրկ հատվածները չորս անգամով աճել են։ Կլիմայի տաքացումը իր հետ ջրի ջերմաստիճանի բարձրացում է բերում, ինչի պատճառով էլ Համաշխարհային օվկիանոսը կշարունակի կորցնել թթվածինը,– կարծում են գիտնականները։
Թթվածնի կորուստը կանխելու համար պետք է կանգնեցնել և գլոբալ տաքացումը և Համաշխարհային օվկիանոսի աղտոտումը,– զգուշացնում է օվկիանոսագետների միջազգային խումբը՝ Դենիզ Բրայթբուրգի գլխավորությամբ։
Երկրի վրա թթվածնի գրեթե կեսը լուծված է Համաշխարհային օվկիանոսում։ Սակայն Երկրի օվկիանոսների և ծովերի ոչ բոլոր ջրերն են հագեցած թթվածնով. կան այսպես կոչված «մահացած գոտիներ», որոնք ամբողջովին զուրկ են թթվածնից, և վերջին տարիներին դրանց ծավալը մեծանում է։
Ջրում թթվածնի ծավալի նույնիսկ աննշան նվազումը դանդաղեցնում է կենդանիների աճը և վերջիվերջո բերում է ամբողջական օրգանիզմների ոչնչացման։
Ջերմաստիճանից բացի, ջրում թթվածնի պարունակության վրա ազդում է սնուցող նյութերի և միկրոօրգանիզմների քանակությունը, որոնք սնվում են ջրում լուծված օրգանական նյութերով և թթվածին են շնչում։ Արդյունաբերական և կենցաղային հեղուկ թափոնները ջուրը հագեցնում են օրգանական նյութերի անոմալ քանակությամբ, որով սնվում են ակտիվորեն թթվածին օգտագործող բակտերիաները, հենց նրանց գործունեությամբ էլ բացատրվում է ափամերձ հատվածներում մահացած գոտիների ընդլայնումը։