Գերմանիային և Թուրքիային կապում են «հատուկ հարաբերությունները». երկու երկրներն էլ պատրաստ են ամեն ինչ անել երկկողմ հարաբերություններում բարդությունները հաղթահարելու համար: Այս մասին հայտարարել է Գերմանիայի արտգործնախարար Զիգմար Գաբրիելը իր թուրք գործընկերոջ՝ Մևլութ Չավուշօղլուի հետ գերմանական Գոսլար քաղաքում բանակցություններից առաջ:
Գերմանիայի ԱԳ նախարարը հիշեցրել է, որ Գերմանիայում բնակվում է թուրքական ծագմամբ մոտ 3 մլն մարդ: «Անկախ նրանից՝ ունեն նրանք թուրքական անձնագիր, թե ոչ, նրանք մեր երկրի քաղաքացիներն են»,- նշել է Գաբրիելը: «Մեզ Թուրքիայի հետ միավորում է շատ ավելին, քան կարելի է ենթադրել»,- հավելել է նա:
ԱԳՆ ղեկավարը խոստովանել է, որ վերջին ամիսներին երկու երկրների հարաբերություններում տարաձայնություններ են եղել: «Մենք բոլոր հարցերում չէ, որ համամիտ ենք միմյանց հետ»,- նշել է նա՝ ընդգծելով, որ չնայած դրան՝ Բեռլինն ու Անկարան պատրաստ են երկխոսության: Նա նշել է, որ երկու երկրների «ԱԳՆ-ները ակտիվացնում են ռազմավարական երկխոսությունը»:
Նախարարը հաղորդել է, որ իր թուրք գործընկերոջ հետ, բացի այս ամենից, մտադիր է քննարկել Սիրիայում, Եմենում և Իրանում իրավիճակը:
