Արմավիրի մարզպետի խորհրդական Մանուկ Սիմոնյանի սպանության գործով նախաքննությունն ավարտվել է, և քրեական գործն ուղարկվել է Արմավիրի մարզի ընդհանուր իրավասության դատարան: Գործը մակագրվել է դատավոր Վահե Խալաթյանին: Այս մասին տեղեկանում ենք Դատալեքս տեղեկատվական համակարգից։
Ըստ մեղադրական եզրակացության համառոտ բովանդակություն Ռուզաննա Մկրտչյանին մեղադրանք է առաջադրվել այն բանի համար, որ նա ապօրինաբար դիտավորությամբ կյանքից զրկել` սպանել է ամուսնուն` Մանուկ Նորիկի Սիմոնյանին։
Ռուզաննա Մկրտչյանը 1992թ.. ամուսնացած լինելով Մանուկ Սիմոնյանի հետ և համատեղ բնակվելով Արմավիրի մարզի Սարդարապատ գյուղի 24 փող. 4-րդ տանը տարիներ շարունակ հաճախակի բռնության է ենթարկվել նրա կողմից:
Հերթական անգամ, 2017թ. հուլիսի 22-ին` ժամը 10-ի սահմաններում, տանը ամուսնու հետ միայնակ մնալուց հետո, վերջինս չնչին առիթն օգտսգործելով, տան 2-րդ հարկի իրենց ննջասենյակում կրկին ծեծի է ենթարկել Ռուզաննա Մկրտչյանին: Այնուհետև ննջասենյակից կնոջը դուրս վռնդելուց հետո, պառկելով մահճակալին քնել է: Ռուզաննա Մկրտչյանը ննջասենյակից դուրս գալուց մի քանի րոպե անց ննջասենյակին կից խոհանոցում գտնվելու ժամանակ տեսել է սառնարանի կողքին` հատակին դրված կացինը և անմիջապես նրա մոտ դիտավորություն է առաջացել ննջարանում ամուսնու քնած լինելու հարմար առիթն օգտագործելով կացինով սպանել նրան` տարիներ շարունակ իրեն ծեծի ենթարկելու և նվաստացնելու համար: Ռուզաննա Մկրտչյանը վերցնելով կացինը և խոհանոցից դեպի ննջասենյակ տանող դռնով մտնելով ներս, մոտեցել է մահճակալին քնած ամուսնուն և նրան ապօրինաբար, դիտավորությամբ կյանքից զրկելու` սպանելու նպատակով կացնով մի քանի անգամ հարվածել է Մանուկ Սիմոնյանի գլխին, որի արդյունքում ստացած մարմնական վնասվածքներից վերջինս տեղում մահացել է:
Սպանությունը կատարելուց հետո, տուն է կանչել որդուն` Նորիկ Սիմոնյանին և արդեն 2017թ. հուլիսի 23-ին` ժամը 04-ի սահմաններում, ամուսնու «Մերսեդես Բենց» մակնիշի 77 NM 779 հաշվառման համարանիշի ավտոմեքենայով որդու հետ ամուսնու դիակը տեղափոխել և թաքցրել են Արմավիրի մարզի Մյասնիկյան-Դալարիկ ավտոճանապարհի աջակողմյան ամայի տարածքում` Դալարիկի ձորից շուրջ 30 մետր հեռավորության վրա, որտեղից էլ այն հայտնաբերվել է 2017թ. հուլիսի 25-ին ժամը 23:30-ի սահմաններում:
Այսինքն Ռուզաննա Մկրտչյանը կատարել է հանցավոր արարք, որը նախատեսված է ՀՀ քր.օրի 104 հոդվածի 1-ին մասով:
Նշենք, սակայն, որ Մանուկ Սիմոնյանի հարազատները, մասնավորապես նրա եղբայրը՝ Արամ Սիմոնյանը պնդում են, որ Ռուզաննա Մկրտչյանը բռնության չի ենթարկվել ամուսնու կողմից։ Դեպքից հետո էլ նրա վրա բռնության ոչ մի հետք չի եղել։ Բացի դա եղբայրը համոզված է, որ Մանուկին սպանել է նրա որդին՝ Նորիկ Սիմոնյանը, քանի որ հայրը հավանություն չի տվել իր ընտրությանը, իր հարսնացուին։ Ասել է, որ միայն իր դիակի վրայով այդ աղջիկն իրենց տուն կմտնի։
Արամ Սիմոնյանը դժգոհ է նախաքննության ընթացքից։ Նրա խոսքով գործից մի շարք էական հանգամանքներ են անհետացել։ Մասնավորապես ձորում դիակի վրա դրված հսկայական քարը, թիակին փաթաթված մետաղալարը։ Իսկ դրանք, եղբոր խոսքով, ապացուցում էին, որ մայրն ու որդին միայնակ չեն եղել։ Նրանց օգնող է եղել։ Իսկ հիմա այդ հանգամանքները անհետացել են գործից, որպեսզի այդ «օգնողները» չներքաշվեն այս գործում և ջրից չոր դուրս գան։