Թուրքիայի նախագահ Թայիպ Էրդողանը քննադատել է ԱՄՆ երդվյալ ատենակալների դատարանի որոշումը՝ մեղավոր ճանաչել թուրքական Halkbank-ի փոխտնօրեն Մեհմեդ Հաքաս Աթիլլային՝ Իրանի դեմ պատժամիջոցների ռեժիմը խախտելու համար, հայտարարելով, որ «ամերիկյան ձևով արդարությունը» անհանգստացնում է ողջ աշխարհին։
«Եթե դա ամերիկյան արդարությունն է, ապա աշխարհը սկսում է անհանգստանալ։ Արդարադատության նկատմամբ նման մոտեցումը անընդունելի է։ Այդքանից հետո ամերիկացիները դեռ փորձում են ուրիշներին սովորեցնել։ Միջազգային իրավունքը, ինչպես նաև երկկողմանի իրավական հարաբերությունները, նման մոտեցման դեպքում կորցնում են իրենց ուժը»,– ասել է Էրդողանը Անկարայում, մամլո ասուլիսի ժամանակ։
Ինչպես նշել է Թուրքիայի ԱԳՆ ղեկավար Մեվլյութ Չավուշողլուն, Աթիլլայի ձերբակալությունը ԱՄՆ–ում իրականացվել է FETO-ի կողմնակիցների նախաձեռնությամբ, իսկ Թուրքիայի փոխվարչապետը Զարաբի և Աթիլայի նկատմամբ քրեական գործը՝ Անկարայի նկատմամբ դավադրություն է անվանել։ Աթիլլայի դատավճիռը կհրապարակվի ապրիլի 11-ին։