Stratfor ընկերության վերլուծաբանները չեն տեսնում Մոսկվայի և Վաշինգտոնի միջև լարվածության նվազման նշաններ։ 2018 թվականին Վաշինգտոնը կուժեղացնի ճնշումը Մոսկվայի վրա ընդլայնված պատժամիջոցների շարքի միջոցով, որոնք ուղղված կլինեն Ռուսաստանի ֆինանսական կայունության, նրա օլիգարխների, հեղինակության և պաշտպանական արդյունաբերության դեմ։
Փետրվարին ԱՄՆ Ֆինանսների նախարարությունը կներկայացնի մանրամասներ՝ պատժամիջոցների հնարավոր ընդլայնման վերաբերյալ, սակայն արդեն հայտնի է, որ նոր սահմանափակող միջոցառումները կթիրախավորեն ռուսական սուվերեն պարտքն ու օլիգարխներին։ Ինչպես գրում են վերլուծաբանները, դա կապված է ԱՄՆ նախագահի ընտրություննեում Ռուսաստանի միջամտության հետաքննության հետ։
Stratfor-ում կանխատեսում են, որ 2018-ին ԱՄՆ-ը, ըստ ամենայնի, պատժամիջոցներ կսահմանի ընդդեմ ռուսական պաշտպանական ընկերությունների, որոնք տրամադրում են տեխնոլոգիաներ կամ մշակումներ, որոնք խախտում են 1987 թվականի՝ Միջանկյալ միջուկային սպառազինությունների մասին պայմանագիրը։
«Մինչդեռ Վաշինգտոնը ծրագրում է, թե ինչպիսի գործիքներ կարող է օգտագործել Մոսկվայի դեմ, Ռուսաստանը պատրաստվում է էլ ավելի կոշտ հարաբերությունների՝ մեկուսացնելով իր տնտեսությունն ու կամուրջներ ստեղծելով ասիախաղաղօվկիանոսյան տարածաշրջանի և Մերձավոր Արևելքի հետ»,-գրում են ընկերության վերլուծաբանները։