Երկրի մակերեսի մոտ մեկ չորրորդ մասին երաշտ է սպասում, եթե ջերմաստիճանի միջին մակարդակը 2 նիշից ավել բարձրանա,– հաղորդում է գիտնականների միջազգային խումբը՝ Nature Climate Change ամսագրում հրապարակած հոդվածում։
Գիտնականները հետազոտել են ապագայի 27 տարբեր կլիմայական մոդելներ և որոշել են այն տարածաշրջանները, որտեղ հողը զգալիորեն կչորանա, երբ գլոբալ տաքացումը ըստ Ցելսիուսի 1,5 -2 աստիճանով բարձրանա մինչինդուստրիալ մակարդակից։ Եկել են հետևության, որ երբ ջերմաստիճանի աճը հասնի երկու աստիճանի, երաշտը կպատի երկրի ցամաքի 20-30%-ը։
«Չորացումը լուրջ վտանգ է, քանի որ մեծ ազդեցություն է թողնում ագրոմշակույթի, ջրի որակի և կյանքի բազմազանության տեսակների վրա։ Այն կարող է բերել նաև երաշտի և անտառային հրդեհների, ինչպիսիք եղան Կալիֆորնիայում»,– ասում է հետազոտության հեղինակը՝ Չան–Ի Պարկը։
Այսօրվա դրությամբ այս ուղղությամբ ամենամանրամասն հետազոտության մեջ, որ իրականացրել են Շենչժենի գիտության և տեխնիկայի համալսարանի, Արևելյան Անգլիայի Համալսարանի, Սեուլի ազգային համալսարանի և Շվեդիայի, ԱՄՆ–ի և Շվեյցարիայի այլ բուհերի մասնագետները, ասվում է, որ միայն եթե մենք կարողանանք գլոբալ տաքացումը պահել 1,5 աստիճանի սահմաններում, մարդկությունը կկարողանա խուսափել երկրի երկու երրորդի վրա լուրջ փոփոխություններից, այդ թվում՝ երաշտից և անտառային հրդեհներից։
Չորացման մակարդակը արդեն բարձրացել է 20-րդ դարում` Միջերկրական ծովի հատվածում, Հարավային Աֆրիկայում և Ավստրալիայի արևելյան ափին, իսկ Մեքսիկայի, Բրազիլիայի, Հարավային Ամերիկայի և Ավստրալիայի կիսաանապատային հատվածները սկսել են անապատի վերածվել։ Հակառակ գործընթացն է տեղի ունենում հասարակածային երկրներում՝ այնտեղ կլիման ավելի խոնավ է դառնում,– հաղորդում է The Guardian-ը։
«Իրականությունը կլիմայի փոփոխության մասին» զեկույցի հեղինակները մեկ տարի առաջ զգուշացնում էին, որ մեր մոլորակը տաքացել է 1 աստիճանով ավել, քան մինչինդուստրիալ ժամանակաշրջանում, իսկ տաս տարվա ընթացքում այս ցուցանիշը կարող է հասնել 1,5C-ի։ Եթե վճռորոշ քայլեր չարվեն, Երկրի ջերմաստիճանը կբարձրանա 2 աստիճանով, և այդ ժամանակ սպասվում են հրդեհներ, փոթորիկներ, կենդանիների թվի և քաղցրահամ ջրերի ծավալի նվազում։