Իրանի գերագույն առաջնորդ այաթոլլա Ալի Խամենեին երկրում զանգվածային անկարգությունների մեղավորներին համարում է իսլամական հանրապետության թշնամի։ Այս մասին ասվում է այաթոլլայի պաշտոնական կայքում հայտնված հայտարարությունում։
«Իրանի թշնամիները միավորվել են և կիրառել տարբեր միջոցներ, որոնք գտնվում են իրենց տրամադրության տակ, ներառյալ գումար, զենք, քաղաքականություն և հետախուզական ուժեր՝ իսլամական հանրապետությանն անհանգստացնելու նպատակով։ Թշնամին մշտապես փնտրում է ցանկացած հնարավորություն և ցանկացած ճեղք՝ ներթափանցելու և իրանցի ժողովրդին հարված հասցնելու համար»,-ասվում է Իրանի առաջնորդի հայտարարությունում։
Չհստակեցնելով, թե ովքեր են այդ թշնամիները, այաթոլլան նշել է, որ ժողովրդի մեջ առկա քաջության ոգին, զոհերը և հավատքը խոչընդոտում են նրանց «իրականացնելու իրենց գազանությունները»։
Խամանեին ընդգծել է, որ դեռևս ելույթ կունենա բողոքական շարժումների հետ կապված հայտարարությամբ, երբ խորհրդակցի մերձավորների հետ։
Ցույցերը դեկտեմբերի 28-ից ճարակել են Իրանի խոշոր քաղաքները՝ Թեհրանը, Մեշհեդը, Սպահանը։ Անկարգությունների հետևանքով զոհվել է մոտ 20 մարդ, առնվազն 450-ը ձերբակալվել են ցույցեր հրահրելու համար։